ភ័ស្តុតាងរួមមានសក្ខីកម្មរបស់សាក្សី និងឯកសារដែលគាំទ្រដល់សំណុំរឿងរបស់អ្នក។ សាក្សីទាំងឡាយជាមនុស្ស (រួមទាំងខ្លួនអ្នក) និងឯកសារនានាបោះពុម្ពជាក្រដាស។ យ៉ាងហោចណាស់ពីរថ្ងៃនៃថ្ងៃធ្វើការមុនពេលសវនាការ អ្នក និងមជ្ឈមណ្ឌលប្រចាំតំបន់ត្រូវតែផ្លាស់ប្តូរបញ្ជីឈ្មោះសាក្សី និងច្បាប់ចម្លងនៃឯកសារដែលអ្នកចង់ប្រើប្រាស់ក្នុងសវនាការ។[1]§ 4712(d). នោះមានន័យថា ទាំងអ្នកនិងមជ្ឈមណ្ឌលប្រចាំតំបន់គួរតែមាននៅក្នុងដៃនូវបញ្ជីឯកសារ និងសាក្សីរបស់គ្នាទៅវិញទៅមកក្នុងរយៈពេលពីរថ្ងៃធ្វើការមុនពេលសវនាការ។
បញ្ជីសាក្សីរបស់មជ្ឈមណ្ឌលប្រចាំតំបន់ត្រូវតែពិពណ៌នាអំពីអ្វីដែលសាក្សីនីមួយៗនឹងផ្តល់សក្ខីកម្ម។ បញ្ជីសាក្សីរបស់មជ្ឈមណ្ឌលប្រចាំតំបន់នឹងជាផ្នែកមួយនៃសេចក្តីថ្លែងការណ៍អំពីគោលជំហរដែលបានពិពណ៌នាខាងក្រោម។ បញ្ជីសាក្សីរបស់អ្នកត្រូវតែផ្តល់ការពិពណ៌នាសង្ខេបអំពីទំនាក់ទំនងរបស់សាក្សីនីមួយៗជាមួយនឹងអ្នក។ ដើម្បីឱ្យសាក្សីនៅឯសវនាការ ដែលនឹងមិនយល់ព្រមធ្វើសក្ខីកម្មចូលរួម អ្នកត្រូវតែធ្វើដីកាកោះដល់ពួកគេ។ ដីកាកោះសាក្សី គឺជាដីកាស្របច្បាប់ដែលបង្ខំពួកគេឱ្យចូលរួមក្នុងសវនាការដោយយុត្តិធម៌ដើម្បីផ្តល់សក្ខីកម្ម។ កោះហៅសាក្សី និងស្នើសុំឱ្យសាក្សីធ្វើសក្ខីកម្មភ្លាមៗនៅពេលដែលអ្នកទទួលបានកាលបរិច្ឆេទសវនាការ ដើម្បីឱ្យពួកគេអាចមានវត្តមានចូលរួមបាន។ ទម្រង់បែបបទសវនាការ រួមមានទម្រង់បែបបទដីកាកោះសាក្សីនៅទីនេះ៖ https://www.dgs.ca.gov/OAH/Case-Types/General-Jurisdiction/Forms/Page-Content/DDS-Forms
មជ្ឈមណ្ឌលប្រចាំតំបន់ត្រូវតែផ្តល់ឱ្យអ្នក និង OAH នូវសេចក្ដីថ្លែងការណ៍អំពីគោលជំហរក្នុងរយៈពេលពីរថ្ងៃធ្វើការមុនពេលសវនាការ។ សេចក្ដីថ្លែងការណ៍នេះនឹងត្រូវបានផ្ញើជូនតាមអ៊ីមែល លើកលែងតែអ្នកប្រាប់មជ្ឈមណ្ឌលប្រចាំតំបន់ថា អ្នកចង់ទទួលបានតាមវិធីផ្សេងទៀត។
- សេចក្ដីថ្លែងការណ៍អំពីគោលជំហរនេះត្រូវតែធ្វើឡើងជាភាសាដែលអ្នក និងអ្នកតំណាងពេញសិទ្ធិរបស់អ្នកចង់បាន។
- សេចក្ដីថ្លែងការណ៍អំពីគោលជំហរនេះត្រូវតែផ្តល់នូវអង្គហេតុអំពីការសម្រេចរបស់មជ្ឈមណ្ឌលប្រចាំតំបន់ និងមូលហេតុសម្រាប់ការសម្រេចនោះ។
- វាត្រូវតែបញ្ជាក់ថា នរណានឹងក្លាយជាសាក្សីរបស់មជ្ឈមណ្ឌលប្រចាំតំបន់។
- វាត្រូវតែមានគ្រប់ឯកសារទាំងអស់ដែលមជ្ឈមណ្ឌលប្រចាំតំបន់ប្រើប្រាស់នៅពេលសវនាការ។
អ្នកមិនចាំបាច់ផ្តល់សេចក្ដីថ្លែងការណ៍អំពីគោលជំហរនោះទេ លើកលែងតែមានមេធាវីតំណាងរូបអ្នក។ ប៉ុន្តែ អ្នកត្រូវតែផ្តល់ឱ្យមជ្ឈមណ្ឌលប្រចាំតំបន់ និង OAH នូវព័ត៌មានមួយចំនួនក្នុងរយៈពេលពីរថ្ងៃធ្វើ់ការមុនសវនាការ។ ព័ត៌មានដែលអ្នកត្រូវតែចែករំលែករួមមាន៖
- បញ្ជីរាយនាមបុគ្គលនានាដែលអ្នកចង់ផ្តល់សក្ខីកម្មនៅពេលសវនាការ។ អ្នកត្រូវរៀបរាប់ថាតើបុគ្គលទាំងនេះមានទំនាក់ទំនងដូចម្តេចជាមួយនឹងអ្នក។ ឧទាហរណ៍ តើបុគ្គលនោះជាសមាជិកគ្រួសារ ឬអ្នកព្យាបាល ឬវេជ្ជបណ្ឌិត។
- ច្បាប់ចម្លងនៃការវាយតម្លៃវិជ្ជាជីវៈ ឬរបាយការណ៍ដែលអ្នកនឹងប្រើប្រាស់នៅពេលសវនាការ។ ឧទាហរណ៍ របាយការណ៍ពីវេជ្ជបណ្ឌិត ឬអ្នកព្យាបាល។
- ប្រសិនបើអ្នកគ្រោងនឹងប្រើប្រាស់ឯកសារផ្សេងៗនៅពេលសវនាការ អ្នកអាចផ្តល់ច្បាប់ចម្លងនៃឯកសារទាំងនោះនៅមុន ឬអំឡុងពេលធ្វើសវនាការ។
| ↑1 | § 4712(d). |
|---|