ជំ​ពូក​ 3៖ មជ្ឈមណ្ឌលថ្នាក់​តំ​បន់

(3.1) តើ​មជ្ឈមណ្ឌលថ្នាក់​​​តំបន់ធ្វើ​អ្វី​ខ្លះ​​?​

មជ្ឈមណ្ឌលថ្នាក់​តំ​បន់​ផ្តល់​សេវាដល់​អ្នក​ដែល​មាន​ពិការភាពក្នុង​ការ​លូត​លាស់​។​ពួកគេ​ក៏ផ្តល់ជូនផងដែរ​នូវ​សេវាអន្តរាគមន៍​ដើមដំបូងដល់​ទារក​និង​ទារកទើបចេះ​ដើរ​ដែល​មានពិការភាព​ ប៉ុន្តែ​យើង​មិន​ពិភាក្សា​អំពីសេវាទាំងនោះ​នៅទីនេះ​ទេ​។​ [[មជ្ឈមណ្ឌលថ្នាក់​តំ​បន់​ផ្តល់​នូវ​សេវា​អន្តរគមន៍​ដំបូង​ដល់​ទារកនិង​កុមារតូច​ដែល​មាន​ពិការភាព (កើត​មក​​ចំថ្ងៃកំណើត​ទី​បីរបស់គេ) ក្រោម “ផ្នែក C” នៃច្បាប់​សហព័ន្ធ​ ស្តី​ពី​ការ​អប់​រំ​បុគ្គល​មាន​ពិការភាព (IDEA) និង​ច្បាប់សេវា​អន្តរាគមន៍​ដំបូង ចាប់ផ្តើម​នៅ​ផ្នែក​ 95000 នៃ​ក្រម​រដ្ឋាភិបាល​​កាលីហ្វ័រញ៉ា។​ សៀវភៅ​ប្រតិបត្តិ​នេះ​​មិន​ក្តោប​ទៅលើសេវាអន្តរាគមន៍​ដំបូង​នោះ​ទេ។ សម្រាប់​ព័ត៌​មាន​បន្ថែម​ស្តី​ពី​សេវាទាំងនេះ សូមមើល​ ជំពូក​ទី12 នៃ​សិទ្ធិអប់រំពិសេស​និង​ការ​ទទួល​ខុស​ត្រូវ ដែល​ជា​ឯកសារ​បោះ​ពុម្ព​មួយ​ផ្សេង​ទៀត​របស់អង្គការ​សិទ្ធិ​ជនពិការ​រដ្ឋ​កាលីហ្វ័រញ៉ា។]]

​មជ្ឈមណ្ឌលថ្នាក់​តំបន់ត្រូវ​តែ​៖

• ស្វែងរក​អ្នក​ដែល​អាច​នឹង​ត្រូវ​ការ​សេវាកម្ម​របស់​មជ្ឈមណ្ឌ​ល​​ថ្នាក់​តំបន់​។ [[ផ្នែក​ 4641.]]
• វាយតម្លៃ​អ្នក​ដែល​ដាក់ពាក្យ​ស្នើសុំសេវាកម្ម​ពី​មជ្ឈមណ្ឌល​ថ្នាក់​តំបន់ ដើម្បី​សម្រេច​ថា​ពួកគេមាន​លក្ខណៈ​សម្បត្តិគ្រប់គ្រាន់អាចទទួល​បាន​ដែរ​ទេ។ [[ផ្នែក​ 4642 និង​ 4643.]]
• សម្របសម្រួល​សេវានានា​សម្រាប់​អ្នកប្រើប្រាស់សេវា​របស់មជ្ឈមណ្ឌល​ក្នុងតំបន់​ទាំងអស់​។ [[ផ្នែក​ 4640.6 និង 4647.]]
• អភិវឌ្ឍ​ផែនការ​កម្មវិធី​ជាលក្ខណៈ​បុគ្គល (IPP) ដែល​ពិចារណា​ទៅ​លើ​តម្រូវ​ការ​​និង​ជម្រើស​របស់អ្នក។ [[ផ្នែក​ 4646 និង​ 4646.5.]]
• ធ្វើឲ្យប្រាកដថា​​អ្នក​ទទួលបាន​រាល់សេវា​និងការគាំទ្រទាំងអស់​ដែលមាន​រៀបរាប់​នៅក្នុង​ IPP។ [[ផ្នែក 4648 និង​ 4651 និង​ផ្នែក​ផ្សេងទៀត​នៃច្បាប់​ Lanterman.]]
• អភិវឌ្ឍន៍​សេវាកម្ម​និង​ការគាំពារថ្មី​
• ពិនិត្យ​គុណភាព​សេវា​និងការគាំទ្រ​នានា​ដែល​បានផ្តល់ជូន​។ [[ផ្នែក 4648 និង​ 4651 និង​ផ្នែក​ផ្សេងទៀត​នៃច្បាប់​ Lanterman. ]]
• ជួយ​អ្នកប្រើប្រាស់សេវា​ដែល​ស្ថិត​នៅក្នុង​កម្មវិធី​ស្វ័យ​សម្រេចចិត្ត​ (Self-Determination Program)។ [[ផ្នែក​ 4685.8]]

(3.2) តើ​មជ្ឍមណ្ឌល​ថ្នាក់​តំបន់​ស្វែងរក​អ្នក​ដែល​អាច​នឹង​មាន​ពិការភាព​​ការលូតលាស់​តាម​របៀប​ណា?​

មជ្ឈមណ្ឌលថ្នាក់​តំ​បន់​ត្រូវ​តែ​ធ្វើ “ការ​ស្វែងរកករណី។” នេះ​មាន​ន័យ​ថា​មជ្ឍមណ្ឌល​ ថ្នាក់​តំបន់​ត្រូវ​ស្វែង​រក​យ៉ាង​សកម្ម​នៅ​ក្នុង​សហគមន៍ ដើម្បី​រកអ្នក​ដែល​មាន​លក្ខណៈ​​សម្បត្តិ​គ្រប់​គ្រាន់​សម្រាប់​សេវាកម្ម​ឱ្យ​បាន​។ ពួក​គេ​ធ្វើ​ការ​ជា​មួយ​នឹង​ទី​ភ្នាក់​ងារ​សុខ​ភាព​សាធារណៈ នាយកដ្ឋាន​សេវាសង្គម​កិច្ច មណ្ឌលសិក្សាធិការ និង​ទីភ្នាក់​ងា​រ​​ថ្នាក់​រដ្ឋ ក្នុង​មូលដ្ឋាន និង​ឯកជន​ផ្សេង​ទៀត។​

វេជ្ជ​បណ្ឌិត ឬ អ្នក​ប្រកបវិជ្ជាជីវៈ​វេជ្ជសាស្រ្ត​ផ្សេងទៀត អាច​ណែនាំ​បុគ្គ​ល​ឲ្យ​ទៅ​កាន់​មណ្ឌល​ថ្នាក់​តំបន់បាន​។ ប៉ុន្តែ អ្នក​មិន​​ត្រូវ​ការ​ការណែនាំ​របស់​វេជ្ជ​បណ្ឌិត​ឱ្យ​ទៅ​មណ្ឌល​​ថ្នាក់​តំ​បន់​នោះ​ទេ។ ជន​គ្រប់​រូប​​ ដែល​គិត​ថាគេ​អាច​​មាន​ពិការភាព​ការលូតលាស់​មាន​សិទ្ធិ​ដាក់​ពាក្យ​ស្នើសុំ​ទៅកាន់​មជ្ឍមណ្ឌល​ថ្នាក់​តំ​បន់បាន។

(3.3) តើ​មជ្ឍ​មណ្ឌល​ថ្នាក់​តំបន់​តំណាង​ឱ្យ​អ្នក​ដែល​មាន ​ពិការភាព និង​សហគមន៍​ដែល​គេ​បម្រើ​តាម​របៀបណា?

ច្បាប់ Lanterman និយាយថា ក្រុមប្រឹក្សាភិបាល​របស់​មជ្ឍ​មណ្ឌល​ថ្នាក់​តំបន់ ត្រូវ​តំណាង​ឲ្យ​សហគមន៍​ដែល​មាន​ពិការភាព​​ការលូតលាស់​។ យ៉ាង​ហោច​ណាស់​មាន 25 ភាគរយ​នៃ​សមាជិក​ក្រុម​ប្រឹក្សាភិបាល​ត្រូវ​តែ​មាន​ពិការភាព​ការលូតលាស់​។ យ៉ាង​ហោច​ណាស់​ពាក់កណ្តាល​នៃ​សមាជិក​ក្រុម​ប្រឹក្សាភិបាល ត្រូវ​តែ​ជា​អ្នក​ដែលមានពិការភាព​ការលូតលាស់ ឬ ជាមាតាបិតា ឬ អ្នកអាណាព្យាបាលស្រប​ច្បាប់​នៃ​បុគ្គល​ដែល​មាន​ពិការភាព​​ការ​លូតលាស់។​ [[ផ្នែក​ 4625 និង 4622.]] ក្រុម​ប្រឹក្សា​​ក៏​ត្រូវ​តែ​ឆ្លុះ​បញ្ចាំង​ទៅលើ​លក្ខណៈ​ភូមិសាស្រ្ត​និង​ជនជាតិ​នៅ​​ក្នុង​តំបន់​ដែល​ខ្លួន​បម្រើការ។ លក្ខណៈ​ពិពិធកម្មនេះ ជួយ​ដល់​មនុស្ស​ជា​ច្រើន​​ឱ្យ​ទទួល​បាន​សេវាកម្ម​ដែល​ពួក​គេ​ត្រូវ​ការ ដោយ​មិន​ប្រកាន់ជាតិសាសន៍​ ជនជាតិ តំបន់ ឬ ប្រាក់​ចំណូល​ឡើយ​។

ច្បាប់ Lanterman ចែងថា មជ្ឈមណ្ឌលថ្នាក់​តំ​បន់​​ត្រូវ​ប្រើ​​ប្រាក់​របស់​រដ្ឋតាម​រូបភាព​ដែលមិន​រើស​អើង​ចំពោះជនណា​ម្នាក់ ក្រុមណា​មួយ​ ឬ គ្រួសារណា​មួយ​ ដោយ​ផ្អែក​លើ​អាយុ ជាតិសាសន៍ ជនជាតិ ឬ ភាសា​ដែល​ពួក​គេ​ប្រើ​ប្រាស់​ឡើយ។ ច្បាប់ចែង​​ថា នាយកដ្ឋាន​សេវាការ​លូតលាស់ (DDS) និង​មជ្ឍ​មណ្ឌល​ថ្នាក់​តំបន់ ត្រូវ​តែ​ប្រ​មូល ​ព័ត៌មាន​ប្រ​ចាំ​ឆ្នាំ​ពី “ការ​ទិញ​សេវា” មជ្ឈមណ្ឌលថ្នាក់​តំ​បន់​។ ព័ត៌​មាន​នេះ​នឹង​ជួយ​​ស្វែង​រក​សហគមន៍​របស់​មជ្ឈមណ្ឌល​ថ្នាក់​តំបន់​ដែល​មិន​ទទួល​បាន​សេវាកម្ម​ដិ​ត​​ដល់​។ [[ផ្នែក​ 4519.5(a) និង (b).]] “ការ​ទិញ​សេវា” គឺ​ជា​ពាក្យ​ត្រូវ​បាន​ប្រើ​ជា​មួយ​នឹង “ការទិញ​នៃ​មូល​និធិ​សេវា។” នេះ​ជា​ប្រាក់​រដ្ឋ​ដែល​មជ្ឍ​មណ្ឌល​ថ្នាក់​តំបន់​ អាច​ប្រើ​ប្រាស់​បាន​​ដើម្បី​​ទិញ​សេវាកម្ម​សម្រាប់​អ្នក​ដែល​មាន​ពិការភាព​តែ​ប៉ុណ្ណោះ។ [[មាត្រា​ 17 ក្រមបទប្បញ្ញត្តិ​រដ្ឋកាលីហ្វ័រញ៉ា​ ផ្នែក​ 54302(a)(52).]] រៀងរាល់ឆ្នាំ​ មជ្ឈមណ្ឌលក្នុង​តំ​បន់​ និង​ DDS ត្រូវតែ​បង្ហោះផ្សាយ​ព័ត៌មាន​ស្តីពី​របៀបដែល​មជ្ឈមណ្ឌល​ក្នុង​តំបន់​នីមួយៗ​កំពុងប្រើប្រាស់​ទឹកប្រាក់​ទៅលើ​ “ការទិញសេវា​” របស់ខ្លួន​។ [[ផ្នែក​ 4519.5​(c) និង​ (d).]] ពួកគេ​ត្រូវតែ​រួមបញ្ចូល​តួលេខ​និង​ភាគរយ​នៃមនុស្ស​ តាមអាយុ​ ពូជសាសន៍ឬជាតិពន្ធុ​ ពិការភាព និង​ប្រភេទ​នៃ​ការស្នាក់នៅ​ (រួមទាំង​ភាសា​និយាយ) ដែល​ពួកគេមានសិទ្ធិទទួលបានសម្រាប់​មជ្ឈមណ្ឌល​ក្នុងតំបន់​​ ប៉ុន្តែ​មិនកំពុង​ទទួលបាន​មូលនិធិសម្រាប់ការទិញ​​សេវា​។ [[ផ្នែក​ 4519.5(b).]] នេះ​មានន័យ​ថា ពួក​គេ​ជា​អតិថិជន ប៉ុន្តែ​មិន​ទទួល​បាន​សេវាណា​មួយ​ឡើយ​។ នៅក្នុង​រយៈ​ពេល​បី​ខែ​នៃ​ការ​បិទផ្សាយរបាយការណ៍​នេះ​នៅ​លើ​គេហទំព័រ​របស់​ខ្លួន មជ្ឈមណ្ឌលថ្នាក់​តំ​បន់​នីមួយៗ​ត្រូវ​រៀប​ចំ​ការ​ប្រ​ជុំ​ជា​សាធារណៈ​មួយ​អំពី​ព័ត៌​មាននេះ។ [[ផ្នែក​ 4519.5​(e).]] មជ្ឈមណ្ឌលថ្នាក់​តំ​បន់​នីមួយៗ ត្រូវ​តែ​ប្រាប់​ដល់ DDS ពី​ផែនការ​របស់​ខ្លួន ដើម្បី​ទិញ​សេវាកម្ម​​ប្រ​ហាក់​ប្រ​ហែល​ក្នុង​​ចំណោម​ក្រុម​នៃ​អ្នក​ដែល​មាន​លក្ខណៈ​សម្បត្តិ​គ្រប់​គ្រាន់​អាច​ទទួល​បាន។ [[ផ្នែក​ 4519.5(f)(1)(C).]] DDS អាច​នឹង​ផ្តល់​នូវ​ប្រាក់​បន្ថែម​ទៀត​ដើម្បី​ជួយ​ដល់​មជ្ឍមណ្ឌល​ថ្នាក់​តំ​បន់​ក្នុងការដោះស្រាយ​បញ្ហា​​ភាព​ខុសគ្នា​ខ្លាំង​នៅក្នុង​ការអនុវត្ត​ការ​ទិញ​សេវាកម្ម​របស់​គេ។ [[ផ្នែក​ 4519.5(h)(1).]]​ ទឹក​ប្រាក់​នេះ​អាច​បង់​សម្រាប់​បង់​ថ្លៃ​​ដូច​ជា​ការ​បន្ថែម​ទៅ​លើ​ចំនួន​បុគ្គលិក​ថែទាំ​ផ្ទាល់​និយាយ​ពីរភាសា ការបណ្តុះបណ្តាល​ពី​សមត្ថភាព​វប្បធម៌ និង​ការ​ផ្សព្វ​ផ្សាយ​ទៅ​ដល់​ក្រុម​ដែល​មិន​ទទួល​បាន​សេវាកម្ម​ដិតដល់។

(3.4) តើ​ខ្ញុំ​អាច​ឱ្យ​មជ្ឍ​មណ្ឌល​ថ្នាក់​តំបន់​របស់​ខ្ញុំ​ផ្តល់​សេវា​ទៅ​តាម​​សមត្ថភាព​ផ្នែក​វប្បធម៌​បាន​ឬ​ទេ?

ច្បាប់ Lanterman មាន​វិធាន​ជា​ច្រើន​ដើម្បីឱ្យ​ប្រាកដ​ថា សេវាកម្ម​ទាំង​ឡាយ​ត្រូវ​បាន​ផ្តល់​តាម​លក្ខណៈ​ជា​សមត្ថភាព​ផ្នែក​វប្បធម៌។​

• សេវាមជ្ឍមណ្ឌល​ត្រូវ​ផ្តល់​​តាម​លក្ខណៈ​សមស្រប​ផ្នែក​វប្បធម៌​និង​ភាសា​ទៅ​ដល់​អ្នក​ដែលមាន​​ពិការភាព​និង​ក្រុម​គ្រួសារ​របស់​ពួកគេ។ [[ផ្នែក​ 4502.1(b).]]
• ក្រុម​ប្រឹក្សាមជ្ឈមណ្ឌលថ្នាក់​តំ​បន់​ ត្រូវ​ពិនិត្យ​មើល​ឡើង​វិញ​ ថាតើ​មជ្ឍមណ្ឌល ​ថ្នាក់តំបន់​កំពុង​ផ្តល់​សេវាកម្ម​​ដែល​​មាន​លក្ខ​ណៈ​សម​ស្រប​​តាម​ភាសានិង  ​វប្បធម៌​បាន​ល្អ​កម្រិត​ណាក្នុង​មួយ​ឆ្នាំ​។ [[ផ្នែក​ 4622(j)(2).]]
• មជ្ឈមណ្ឌលថ្នាក់​តំ​បន់​​ចុះ​កិច្ច​សន្យា​ជា​មួយ​នឹង​រដ្ឋ ត្រូវ​តែ​រួម​បញ្ចូល​នូវ​វត្ថុ​បំណ​ង​បំពេញការងារ​ប្រ​ចាំឆ្នាំ​ ដូចជាការផ្តល់​សេវាកម្ម​សម​ស្រប​តាម​វប្បធម៌​និង​ភា​សា​ជាដើម។ [[ផ្នែក​ 4629(a)(1)(A)(iii).]]
• ការវាយ​តម្លៃ​មជ្ឈមណ្ឌលថ្នាក់​តំ​បន់​សម្រាប់ការ​ធ្វើ​ផែន​ការ IPP ត្រូវ​តែ​ដឹង​​និង​សម​ស្រប​ចំពោះ​សវតាវប្បធម៌​របស់​បុគ្គល​និង​គ្រួសារ។ ​[[ផ្នែក​ 4646.5(a)(1).]]
• សេវាកម្ម​​អភិវឌ្ឍន៍​ធន​ធាន​សហគមន៍​មជ្ឍ​មណ្ឌល​ថ្នាក់​តំបន់​ត្រូវ​តែ​មាន​លក្ខណៈ​ សមស្រប​​តាម​វប្បធម៌និង​ភាសា។ [[ផ្នែក​ 4679(a).]]
• សេវាគាំពារ​ក្រុម​គ្រួសារ​របស់​មជ្ឈមណ្ឌលថ្នាក់​តំ​បន់​ ត្រូវ​តែ​ឆ្លើយ​តប​ឱ្យ​បាន​ទៅ​នឹង​ការពេញចិត្តផ្នែក​វប្បធម៌​និង​គុណ​តម្លៃ​របស់​ក្រុម​គ្រួសារ​ដែល​ទទួល​សេវា។ [[ផ្នែក​ 4685(b)(4).]]
• មជ្ឈមណ្ឌលថ្នាក់​តំ​បន់​ និង DDS ត្រូវ​តែ​តាម​ដាន​និង​វាយ​តម្លៃ​ទៅ​លើ​ទី​ភ្នាក់​ងារ ​និង​ផ្ទះដែល​​ផ្តល់សេវា​​តាម​ផ្ទះ ដើម្បី​ឲ្យ​ប្រាកដ​ថា​ពួក​គេ​យក​មក​អនុវត្ត​នូវ  ​វប្បធម៌និង​គុណ​តម្លៃ​របស់​ពលរដ្ឋ​តាម​លំនៅដ្ឋាន។​ [[ផ្នែក​ 4689.1(e)(8)(E).]]
• DDS ត្រូវ​តែ​ពិភាក្សា​ជា​មួយ​នឹង​អ្នក​ទាំង​ឡាយ​និង​ក្រុមគ្រួសារ ដែល​ឆ្លុះ​បញ្ចាំង ​ទៅលើ​ពិពិធភាព​ផ្នែក​ជាតិសាសន៍​និង​ភាសា​ក្នុង​តំបន់​របស់​​មជ្ឍ​មណ្ឌល​ថ្នាក់​តំបន់ ដើម្បី​ជួយ​អភិវឌ្ឍន៍​និង​បណ្តុះ​នូវ​សេវាកម្ម​សម​ស្រប​តាម​បែបវប្បធម៌​។ នេះ​គឺ​ដើម្បី​ការពារ​​មជ្ឍ​មណ្ឌល​ថ្នាក់​តំបន់​ពី​ការចំណាយ​ប្រាក់​លើ​​ការ​ទិញ  ​សេវា​របស់​គេ​តាម​លក្ខណៈ​ដែល​​រើស​អើង​ចំពោះ​ក្រុម​មនុស្ស​ជាក់លាក់ទាំង​ឡាយ​។ [[ផ្នែក​ 4519.5(g)(1)(C).]]
• ការ​វាយ​តម្លៃ​ទៅលើមជ្ឈមណ្ឌលថ្នាក់​តំ​បន់​របស់ DDS ត្រូវ​រួម​បញ្ចូល​នូវ​​ការ​មើល​ពី​ការ​ផ្តល់​សេវាកម្ម​​របស់​មណ្ឌល​ធ្វើ​ឡើង​តាម​លក្ខណៈ​សមត្ថភាព​វប្បធម៌ ​និង​ភាសាដែរឬទេ។ [[ផ្នែក​ 4571(b).]]

ដោយសារ​តែ​លក្ខ​ខណ្ឌ​តម្រូវ​ទាំង​នេះ​ហើយ អ្នក​និង​ក្រុម​គ្រួសារ​របស់​អ្នក គួរ​តែ​ជជែក​ជា​មួយ​នឹង​អ្នក​សម្រប​សម្រួល​សេវា​របស់​អ្នក​អំពី​ភាសា វប្បធម៌ និង​គុណ​តម្លៃ​របស់​អ្នក។ ធ្វើ​បែប​នេះ​នៅពេល​អ្នក​សម្រប​សម្រួល​សេវា​របស់អ្នក​​ប្រ​មូល​ព័ត៌​មាន​អំពី​អ្នក​សម្រាប់​ IPP របស់​អ្នក។ មជ្ឈមណ្ឌលថ្នាក់​តំ​បន់​​ត្រូវ​រក្សា​គិត​ដល់​បទជីវិត​ និង​វប្បធម៌​គ្រួសារ​របស់​អ្នក​ នៅពេល​ពួក​គេ​ជួប​ជា​មួយ​អ្នក​ដើម្បី​ពិភាក្សា​អំពី​ IPP របស់​អ្នក។ មជ្ឈមណ្ឌលថ្នាក់​តំ​បន់​​ ត្រូវ​ប្រើ​ប្រាស់​ព័ត៌​មាន​ដែល​អ្នក​ផ្តល់​ដល់​ពួក​គេ​អំពី​វប្បធម៌​របស់​អ្នក ដើម្បី​ជួយ​​ឲ្យ​ក្រុម​ការងារ​របស់អ្នក​បង្កើត​ឡើង​នូវ IPP ដែល​ពិចារណា​ដល់​វប្បធម៌​ ភាសា និង​គុណ​តម្លៃ​របស់អ្នក។ ការ​ផ្តោត​ទៅលើ IPP ត្រូវ​តែ​ផ្អែក​លើ​ក្តី​ប្រាថ្នា តម្រូវការ និង​ក្តី​ស្រ​មៃ​របស់​អ្នក ជាជាង​ផ្អែក​លើ​បញ្ជី​រាយ​ឈ្មោះ​សេវាកម្ម​និង​ការ​គាំ​ទ្រ​ដែល​មិន​មានផ្តល់​ជូន​។​ មជ្ឈមណ្ឌលថ្នាក់​តំ​បន់​​ក៏​អាច​ជួល​បុគ្គលិក​ដែលនិយាយ​ភាសាផ្សេងៗ​ និង​ជា​ផ្នែកនៃ​វប្បធម៌​ខុសៗ​គ្នា។​ ពួក​គេ​អាច​បង្កើត​បាន​ជា​ក្រុម​គាំ​ទ្រ​ធ្វើ​ឡើង​ជា​ភាសាផ្សេង​ក្រៅ​ពី​អង់​គ្លេស។ ពួក​គេ​ក៏អាច​ប្រើ​ប្រាស់​អ្នក​ផ្តល់​សេវា​ដែល​មាន​បុគ្គលិក​និយាយ​ ពហុភាសាបាន​ផង​ដែរ។

(3.5) តើត្រូវ​ធ្វើ​យ៉ាង​ម៉េច ប្រ​សិន​បើ​ខ្ញុំ​ត្រូវ​ការ​អ្នក​បក​ប្រែ​ភាសានៅឯ​ការ​ប្រ​ជុំ​ជា​មួយ​នឹង​មជ្ឍមណ្ឌល​ថ្នាក់​តំបន់ ឬ​បក​ប្រែ  ​ឯកសារ​ជា​ភាសា​ដែល​ខ្ញុំ​ប្រើ​ប្រាស់នោះ?

ការ​ទំនាក់​ទំនង​មាន​សារសំខាន់​ណាស់។ ប្រ​សិន​បើ​អ្នក​មិន​ចេះ​និយាយ​ភាសាអង់គ្លេស មាន​បញ្ហាយល់​ភាសា​អង់គ្លេស ឬ​មាន​អារម្មណ៍ថា​​មាន​ទំនុកចិត្ត​ជាង​ក្នុង​ការ​និយាយ​ភាសា​ផ្សេង​នោះ សូម​ប្រាប់​ដល់​មជ្ឍ​មណ្ឌល​ថ្នាក់​តំបន់​ភ្លាម។ សុំ​ឲ្យ​ពួកគេ​ផ្តល់នូវ​អ្នកបកប្រែ​សម្រាប់​ការហៅទូរសព្ទ​ឬ​កិច្ច​ប្រជុំ​ណាមួយ​ រួមទាំង​កិច្ច​ប្រជុំ​ IPP ផងដែរ​។​ [[ផ្នែក​ 4646(i)(1), ក្រមរដ្ឋាភិបាល​ ផ្នែក​ 11135 – 11139.8 មាត្រា​ 22 ក្រម​បទបញ្ញត្តិ​រដ្ឋ​កាលីហ្វ័រញ៉ា​ ផ្នែក​ 11162(c).]] មជ្ឈមណ្ឌលថ្នាក់​តំ​បន់​​ត្រូវ​ទំនាក់ទំនង​ជា​មួយ​នឹង​អ្នកជា​​ភាសា​កំណើត​របស់​អ្នក​នៅ​ឯកិច្ច​ប្រ​ជុំ​ទាំង​នេះ​។​ អ្នក​អាច​នាំ​មិត្ត​ភក្តិ ឬ​សមាជិកក្រុម​គ្រួសារ​ដែល​និយាយ​ភាសាអង់គ្លេស​មក​ជា​មួយ​ដើ​ម្បី​ជួយ​ដល់​អ្នកបាន​។​ ប៉ុន្តែ​មជ្ឍ​មណ្ឌល​ថ្នាក់​តំបន់​មិនអាច​បង្ខំ​ឲ្យ​យក​មិត្ត​ភក្តិ​មក​ជួស​ឲ្យ​ការ​ជួល​អ្នក​បក​ប្រែ​បាន​ទេ។

អ្នកក៏អាច​ឲ្យ​គេ​បក​ប្រែ​ IPP របស់អ្នក​ និង​ឯកសារពាក់ព័ន្ធផ្សេងទៀត​ផងដែរ​។ [[ផ្នែក​ 4646(i)(2).]] ប្រសិនបើអ្នកមិនយល់ស្រប​ជាមួយនឹង​ការសម្រេចរបស់​មជ្ឈមណ្ឌល​ក្នុង​តំបន់ទេ ហើយអ្នកធ្វើឧទ្ធរណ៍ នោះ​មជ្ឈមណ្ឌល​ក្នុងតំបន់​​ត្រូវតែ​ជួល​ និង​បង់ប្រាក់​ឲ្យអ្នកបកប្រែ​ភាសា​ ប្រសិនបើអ្នក​ត្រូវការ​អ្នកបកប្រែនោះ​។ ​[[ផ្នែក​ 4710.8(c).]] វា​នឹង​ស៊ីពេល​ច្រើន​ដើម្បី​រៀប​ចំ​សេវាទាំង​នេះ ដូច្នេះ​សូម​ប្រាប់​ដល់​មជ្ឍ​មណ្ឌល​ថ្នាក់តំបន់​ភ្លាមៗ។ ប្រសិន​បើ​មជ្ឍមណ្ឌល​ថ្នាក់តំបន់​បដិសេធ​ការ​បកប្រែ​ឯកសារ ឬ ផ្តល់​អ្នក​បក​ប្រែ​នោះ សូម​ទូរសព្ទ​ទៅកាន់​ Disability Rights California ឬ OCRA សម្រាប់​ព័ត៌​មាន​អំពី​សិទ្ធិ​របស់អ្នក​។

(3.6) តើ​ត្រូវ​ធ្វើ​ដូចម្តេច ប្រ​សិន​បើ​ខ្ញុំ​មិន​អាច​ទៅ​កាន់​​មជ្ឍ​មណ្ឌល ​ថ្នាក់​តំបន់​តាម​ការ​ណាត់​ និង​ការ​ប្រ​ជុំ​បាន​ដោយសារតែ  ​ពិការភាព​របស់​ខ្ញុំ?

ប្រ​សិន​បើអ្នក​មិនអាច​ទៅ​កាន់​មជ្ឍមណ្ឌល​ថ្នាក់តំបន់​ដោយ​សារ​តែ​ពិការភាព​របស់អ្នកនោះ បុគ្គលិក​មជ្ឍមណ្ឌល​ត្រូវ​មក​ជួប​អ្នក​នៅ​ផ្ទះ។ ច្បាប់​សហព័ន្ធ (រួម​ទាំង​ផ្នែក 504 នៃ​ច្បាប់ស្តារលទ្ធភាព​ពលកម្ម និង​បទបញ្ញ​ត្តិទាំង​ឡាយ​របស់​វា) ផ្តល់​ដល់អ្នក​នូវ​សិទ្ធិ​ចំពោះ​ប្រ​ភេទនៃ​ “ការផ្តល់​ជូន។” [[មាត្រា​ 29 ក្រមច្បាប់សហរដ្ឋ​អាមេរិក​ ផ្នែក​ 794, មាត្រា​ 45 ក្រមបទបញ្ញត្តិ​ សហព័ន្ធ​ ផ្នែក​ 84.22(b).]] សិទ្ធិ​នេះ​អនុវត្ត ចំពោះ​គ្រ​ប់​ទី​ភ្នាក់ងារសាធារណៈ​ទាំង​អស់ ដែល​ផ្តល់​អត្ថប្រយោជន៍ ឬ សេវាកម្ម រួមទាំងសេវាគាំពារ​តាម​ផ្ទះ (IHSS) សន្តិសុខ​សង្គម និង​ទីភ្នាក់ងារផ្សេងៗ​ទៀត។​ ទីភ្នាក់​ងារ​​អាច​ធ្វើ​ការ​ជា​មួយ​អ្នក​តាម​ទូរសព្ទបាន ប្រ​សិន​បើ​អ្នក​ត្រូវការ។ អ្នក​ក៏​អាច​ចូល​រួម​បាន​ផង​ដែរ​នៅ​ក្នុង​សវនាការ និង​ការ​ប្តឹង​ជំទាស់​តាម​ទូរសព្ទ។

(3.7) តើ​ខ្ញុំ​ដាក់ការ​ស្នើសុំ​​សេវា​ទៅ​កាន់​មជ្ឍមណ្ឌល​ថ្នាក់​តំបន់តាមរបៀប​ណា?

ជា​ដំបូង​ សូម​ទាក់ទង​ទៅ​កាន់​មជ្ឍមណ្ឌល​ថ្នាក់​តំបន់ក្នុង​មូលដ្ឋាន​របស់​អ្នក។​ មានមជ្ឈមណ្ឌលប្រចាំតំបន់ ចំនួន 21 ស្ថិតនៅក្នុងរដ្ឋកាលីហ្វ័រញ៉ា។ មណ្ឌលនីមួយៗ​ទទួល​បន្ទុក​លើ​តំបន់​ជាក់លាក់។ អ្នក​ត្រូវ​តែ​ដាក់ពាក្យ​ទៅ​កាន់​មណ្ឌល​នៅក្នុង​តំបន់របស់អ្នក។​ សូមមើល បញ្ជី​មជ្ឈមណ្ឌលក្នុងតំបន់ ឬ​ទូរសព្ទ​ទៅលេខ៖

OCRA៖ (800) 390-7032។
នាយកដ្ឋាន​សេវាការលូតលាស់៖ (916) 654-1958

បុគ្គលិក​ទទួល​ភ្ញៀវ ឬ បុគ្គលិក​ប្រចាំ​ការ​អនុញ្ញាត​ឲ្យ​អ្នក​ដាក់​ពាក្យ​សុំ​សេវា​ពី​មជ្ឈ​មណ្ឌល​ថ្នាក់​តំបន់។ ផ្នែក​ដាក់ពាក្យ​សុំ​នឹ​ងទទួល​ការ​ណាត់​ជួប​សម្រាប់​ការ​ជួប​លើក​ដំបូងរបស់អ្នក ដែល​ហៅ​ថា “ការទទួល​បឋម។” ក្រោយ​ដាក់ពាក្យសុំ មជ្ឈមណ្ឌលថ្នាក់​តំ​បន់​​ត្រូវ​បំពេញ​ “ការជួបបឋម” ក្នុងរយៈ​ពេល 15ថ្ងៃ​នៃ​ថ្ងៃធ្វើការ។ [[ផ្នែក​ 4642​(a)(2).]] បុគ្គលិក​ប្រ​ចាំការ នឹង​ប្រមូល​ព័ត៌​មាន​ពី​អ្នក។​ អ្នក​អាច​សួរ​ទៅកាន់​សមាជិក​នៃ​បុគ្គលិក​មជ្ឈមណ្ឌល​ថ្នាក់តំបន់ រួម​ទាំង​បុគ្គលិកសង្គមកិច្ច អ្នក​ចិត្តវិទ្យា អ្នកវិជ្ជាជីវៈសុខភាព ឬ អ្នក​ជំនាញ​ផ្សេង​ទៀត។​ ពួកគេធ្វើ​ការ​រួម​គ្នា​ជា​ក្រុម​ក្នុង​ដំណើរការទទួល​និង​វាយតម្លៃ​។ ក្រុម​ការងារនេះ​មាន​ឈ្មោះថា ក្រុមពហុជំនាញ ឬ ក្រុម ID ហើយ​ក្នុ​ង​នោះ​យ៉ាង​ហោច​ក៏មាន​វេជ្ជ​បណ្ឌិត​ម្នាក់​ អ្នក​ចិត្តសាស្ត្រ​​ម្នាក់ និង​អ្នក​សម្រប​សម្រួ​ល​ម្នាក់ផងដែរ។ [[មាត្រា​ 17 ក្រមបទបញ្ញត្តិ​រដ្ឋកាលីហ្វ័រញ៉ា​ ផ្នែក​ 54001(b).]]

(3.8) តើខ្ញុំត្រៀមរៀបចំសម្រាប់ការ​ទទួល​ជួប​បឋម​ដូចម្តេច?

សូម​យក​មក​ជា​មួយ​នូវ​ប័ណ្ណ​អត្ថប្រយោជន៍​សុខភាព ដែល​បង្ហាញ​ពី​អត្ថប្រយោជន៍​ថែទាំសុខភាព​របស់អ្នក។ នេះ​​សំដៅ​លើធានារ៉ាប់រង​សុខភាព​ឯកជន ផែនការថែទាំសុខភាព Medi-Cal, Medicare ឬ TRICARE (សម្រាប់ក្រុម​គ្រួសារយោធា)។ [[ផ្នែក​ 4643(c). ប្រសិន​បើ​អ្នក​ពុំមាន​​អត្ថប្រយោជន៍​បែបនេះទេ មជ្ឈមណ្ឌលថ្នាក់​តំ​បន់​​មិន​អាច​ប្រើ​ព័ត៌​មាន​នោះ​ដើម្បី​បដិសេធ ឬ កាត់បន្ថយ​សេវា​ដែល​អ្នក​អាចនឹង​ទទួល​បា​ន​ពី​មជ្ឈមណ្ឌល​ថ្នាក់​តំបន់បានឡើយ។​]] យកមកជាមួយនូវឯកសារនានា ដែល​អ្នកទទួល​បាន​ពី​គ្រូពេទ្យ មន្ទីរពេទ្យ គ្លីនិកសុខភាព សាលារៀន និង​នរណា​ម្នាក់ផ្សេងដែល​ស្គាល់​អ្នក និងដឹង​ពី​ប្រវត្តិ​ការលូតលាស់របស់អ្នក។​ សូម​យក​ឈ្មោះ អាសយដ្ឋា​ន និង​លេខទូរសព្ទ​របស់​វេជ្ជបណ្ឌិត​របស់អ្នក អ្នក​ចិត្តវិទ្យា និង​អ្នក​ថែទាំសុខភាព​អាជីពផ្សេងទៀត។​ នេះ​អាច​ជួយ​ពន្លឿន​ដល់​ដំណើរការការងារ។​ ឯកសារបន្ថែមផ្នែក D  នៃ​សៀវភៅ​ប្រតិបត្តិនេះ គឺ​ជា​សន្លឹក​បង្ហាញការផ្ទៀង​ផ្ទាត់ ដែល​នឹង​ជួយ​ដល់​អ្នក​ក្នុង​ការ​យក​មក​នូវ​ព័ត៌​មាន​ដែល​ចាំ​បាច់​សម្រាប់​ការជួប​ជាលើកដំបូង​របស់អ្នក។​

(3.9) តើមានអ្វីកើតឡើងខ្លះ​នៅក្នុងការទទួល​ជួប​ជា​លើក​ដំបូង​នោះ​?

មជ្ឈមណ្ឌលថ្នាក់​តំ​បន់​នឹង​សុំ​ឲ្យ​អ្នក​បំពេញ​ទម្រង់បែបបទ​និង​ចុះហត្ថលេខា​ព្រម​ផ្តល់​ ព័ត៌​មាន ដើម្បី​ឲ្យ​ពួក​គេ​អាចទទួល​យក​សំណុំ​ឯកសារ​របស់អ្នក​បាន។​ ពួក​គេ​ក៏គួរ​តែ​ផ្តល់​ព័ត៌​មាន​និង​ដំបូន្មាន​អំពី​សេវា​មជ្ឈមណ្ឌល​ថ្នាក់​តំ​បន់ និង​សេវា​នៅ​តាម​ទី​ភ្នាក់​ងារ ​ផ្សេង​ទៀត។ ពួក​គេ​គួរ​ប្រាប់​ដល់អ្នក​អំពីក្រុមប្រឹក្សា​រដ្ឋ​ស្តីពី​ពិការភាពផ្នែកលូតលាស់​ អង្គការ​សិទ្ធិ​ជនពិការ​រដ្ឋ​កាលីហ្វ័រញ៉ា​ និង​ OCRA, និង​ផ្តល់​ព័ត៌​មាន​ទំនាក់​ទំនង​ដល់​អ្នក​។ [[ផ្នែក​ 4646(c).]] មជ្ឈមណ្ឌលថ្នាក់​តំ​បន់​នឹង​សម្រេច​​​ថាតើ​ពួក​គេ​ត្រូវ​ការ​ការវាយ​តម្លៃ​ជា​ផ្លូវ​ការដែរឬអត់។ ប្រ​សិន​បើ​ពិការភាព​របស់​អ្នក​ត្រូវ​បាន​រៀប​ចំ​កត់​ត្រា​បាន​ត្រឹម​ត្រូវនោះ អ្នក​អាច​នឹង​មិន​ត្រូវការ​​ឲ្យ​មានការវាយ​តម្លៃ​ផ្លូវ​ការ​ឡើយ។

(3.10) តើ​ដំណើរការ​ពិនិត្យ​លើ​លក្ខណៈ​សម្បត្តិ​ត្រូវ​ទទួល​បាន ​ប្រ​ព្រឹត្តិទៅ​យ៉ាង​ដូច​ម្តេច?​

បន្ទាប់​ពីការទទួល​យក​លើក​ដំបូង​ មជ្ឈមណ្ឌលថ្នាក់​តំ​បន់​​មាន​រយៈពេល​ 120ថ្ងៃ​ដើម្បីសម្រេចថា​ តើ​អ្នក​មានសិទ្ធិទទួលបានដែរឬអត់​។ [[ផ្នែក​ 4643(a).]] ប៉ុន្តែ មជ្ឈមណ្ឌល​ក្នុងតំបន់​មាន​រយៈពេល​ 60ថ្ងៃ​ដើម្បីសម្រេចថា​៖

• ការ​ពន្យារពេល​នឹង​ផ្តល់ហានីភ័យ​ដល់សុខ​ភាព​និង​សុវត្ថិភាព​របស់អ្នក ឬ​​បន្តពន្យារពេល​​បន្ថែម​ទៀត​ដល់​ការ​លូតលាស់​ផ្នែក​ផ្លូវចិត្ត​និង​រាងកាយ​របស់​អ្នក ឬ​
• មាន​ហានីភ័យ​ខ្លាំង​ដែល​អ្នក​នឹង​ត្រូវ​ដាក់​នៅ​ក្នុង​កន្លែង​ដែល​កំណត់​តឹង​រ៉ឹង​ជាង​មុន។ ឧទាហរណ៍ ការប្តូរអ្នក​ពីការ​រស់នៅ​ជា​មួយ​ក្រុម​គ្រួសារ​ឲ្យ​មក​រស់​នៅ​តាម​មណ្ឌល​វិញនោះ។ [[ផ្នែក​ 4643(a). ]]

ប្រ​សិន​បើ​អ្នក​មាន​លក្ខណៈ​សម្បត្តិ​គ្រប់គ្រាន់ទទួល​បាន​សេវាកម្ម​នោះ មជ្ឈមណ្ឌលថ្នាក់​តំ​បន់​​មាន​រយៈ​ពេល 60ថ្ងៃ​ដើម្បី​បញ្ចប់​ផែនការ​កម្ម​វិធី​លក្ខណៈ​បុគ្គល (IPP) របស់​អ្នក។ [[ផ្នែក 4646(c).]]

(3.11) នៅ​ពេល​ណាដែល​មជ្ឈមណ្ឌល​ថ្នាក់​តំបន់​ត្រូវ​​ធ្វើ​ការ​វាយ​តម្លៃ​បន្ថែម​​ ដើម្បី​សម្រេច​ថាតើខ្ញុំ​មាន​លក្ខណៈ​សម្បត្តិគ្រប់​គ្រាន់​ទទួល​បាន​សេវាដែរ​ឬអត់​នោះ?​

ពេលខ្លះមជ្ឈមណ្ឌល​ថ្នាក់​តំបន់​ត្រូវ​ការ​ព័ត៌​មាន​បន្ថែម​ដើម្បី​សម្រេច ថាតើ​អ្នក​មានពិការភាព​ផ្នែក​ការ​លូត​លាស់​ដែរឬអត់នោះ។ ពេល​ខ្លះ​ព័ត៌​មាន​នៅ​ក្នុង​កំណត់​ត្រា​រប​ស់​អ្នក​មិន​ជាក់លាក់​​ទៅ​នឹង​ពិការភាព​ផ្នែក​ការ​លូត​លាស់​របស់អ្នក ដែល​មជ្ឈ​មណ្ឌលថ្នា​ក់​​​តំ​បន់​ត្រូវ​ផ្តល់​សេវា​នោះទេ។ កំណត់​ត្រា​របស់អ្នក​អាច​ផ្ទុយ​គ្នា ដោយមាន​​ល​ក្ខ​​ខ​ណ្ឌ​ផ្សេង​ដើម្បី​ពន្យល់​ពី​ពិការភាព​របស់អ្នក។ ពេល​ខ្លះ​ព័ត៌​មាន​នៅ​ក្នុង​កំណត់​ត្រា​របស់អ្នក​បង្ហាញ​ថា អ្នក​មាន​លក្ខ​ខណ្ឌ​ ប៉ុន្តែ​វា​មិន​បង្ហាញ​ពីលក្ខណៈពិការភាព​ខ្លាំង​សម្រា​ប់​អ្នកឡើយ។ នៅក្នុង​លក្ខ​ខណ្ឌ​ទាំង​នេះ មជ្ឈមណ្ឌលថ្នាក់​តំ​បន់​​អាច​នឹង​វាយ​តម្លៃ​អ្នក​ដើម្បី​ឲ្យ​ដឹង​ថា​តើអ្នក​មាន​លក្ខណៈ​សម្បត្តិ​គ្រប់គ្រាន់​ដែរឬអត់។ ពួក​គេ​ក៏​ចង់​ឃើញ​ពី​​សេវាកម្ម​ដែល​អ្នក​ត្រូវ​ការ​ដើម្បី​រស់នៅដោយ​មាន​ឯករាជ្យ​ ផលិតភាព​ និង​ជីវិតធម្ម​តា​បាន​ច្រើន​បំផុត​ដែល​អាច​ធ្វើ​បាន។​ ក្រុម​ការងារ​របស់​បុគ្គលិក​មជ្ឈមណ្ឌល​ថ្នាក់​តំប​ន់​ដែល​មាន​ឈ្មោះ​ថា ក្រុម​ពហុ​ជំនាញ (ក្រុម ID) ពិនិត្យ​ទៅ​លើ​កំណត់​ត្រា​របស់​អ្នក​ ដើម្បី​ឲ្យ​ដឹង​ថា​តើ​ពួក​គេ​ត្រូវ​ការ​ធ្វើ​ការ​វាយ​តម្លៃ​បន្ថែម​ទៀត​ឬអត់។

(3.12) តើ​ធ្វើ​ដូចម្តេច​ដើម្បី​ឱ្យ​ដឹង​ថា​មជ្ឈមណ្ឌល​ថ្នាក់​តំបន់  ​ពិនិត្យ​ដឹង​ថា​ខ្ញុំ​មាន​លក្ខណៈ​សម្បត្តិ​គ្រប់​គ្រាន់​ទទួល​បាន  ​សេវាកម្ម​របស់​ពួក​គេ?

ក្រោយ​ពីការ​ទទួល​និង​វាយ​តម្លៃ​ជា​បឋម ប្រ​សិន​បើ​មជ្ឈមណ្ឌល​ថ្នាក់​តំបន់​សម្រេច​ថា​​អ្នកមាន​លក្ខណៈ​សម្បត្តិ​គ្រប់​គ្រាន់​នោះ ពួក​គេ​នឹង​ផ្ញើ​សេចក្តី​ជូន​ដំណឹង​ជា​លាយលក្ខណ៍​អក្សរ​ដល់អ្នក។​ ប្រ​សិន​បើ​មជ្ឈមណ្ឌលសម្រេច​ថា​អ្នកមិន​​មាន   ​លក្ខណៈ​សម្បត្តិ​គ្រប់គ្រាន់​ទេ​នោះ ពួក​គេ​ត្រូវ​តែ​ផ្ញើឲ្យ​អ្នកនិង​អ្នក​តំ​ណាង​របស់​អ្នក​ប្រ​សិន​បើអ្នក​មាន នូវ​សេចក្តី​ជូន​ដំណឹង​ជា​លាយលក្ខណ៍​អក្សរ​តាម​សេវាបញ្ញើមាន​បញ្ជាក់​​ក្នុង​រយៈពេល​ប្រាំ​ថ្ងៃ​នៃ​ថ្ងៃ​ធ្វើ​ការ​អំ​ពី​ការ​សម្រេច​ចិត្ត​របស់​ពួក​គេ។ [[ផ្នែក​ 4710(e).]]

(3.13) តើ​ត្រូវ​ធ្វើ​ដូច​ម្តេច​ប្រ​សិន​បើ​មជ្ឈមណ្ឌល​និយាយ​ថា ខ្ញុំ​មិន​មាន​លក្ខណៈ​សម្បត្តិ​គ្រប់​គ្រាន់​​ដើម្បី​ទទួល​បាន​សេវាកម្ម​របស់​គេ ប៉ុន្តែ​ខ្ញុំ​គិត​ថា​ខ្ញុំ​មាន​លក្ខណៈ​សម្បត្តិ​គ្រប់គ្រាន់នោះ?

ប្រ​សិន​បើ​មជ្ឈ​មណ្ឌល​សម្រេច​ថា អ្នក​មិន​មាន​សិទ្ធិ​គ្រប់គ្រាន់ទទួល​បាន​សេវាកម្ម​ទេ អ្នក​មាន​សិទ្ធិ​ដើម្បី​ប្តឹង​ជំទាស់បាន។​ [[ផ្នែក​ 4710.5(a).]]

ចំណុចសំខាន់៖ ប្រ​សិន​បើ​អ្នក​សម្រេច​ប្តឹង​ជំទាស់ អ្នក​ត្រូវ​តែ​ធ្វើ​វា​ក្នុង​រយៈ​ពេល 30ថ្ងៃ​រាប់​ចាប់​ពី​ថ្ងៃ​ដែល​អ្នក​ទទួល​បាន​សេចក្តី​ជូន​ដំណឹងតាម​សំបុត្រ​ពី​មជ្ឈមណ្ឌល​ថ្នាក់តំបន់។ [[ផ្នែក​ 4710.5(a); មើល​ ជំពូក​ 10 ស្តីពី​វិវាទ​និង​ការប្តឹង​ឧទ្ធរណ៍​.]]

ព័ត៌​មាន​នៅ​ក្នុង​សៀវ​ភៅ​ប្រតិបត្តិនេះ នឹង​ជួយ​ដល់អ្នក​ក្នុង​ការ​ប្តឹង​ជំ​ទាស់​របស់អ្នកបាន​​៖

• មាត្រា 2 មាន​ព័ត៌​មាន​ជាច្រើន​អំពី​ពិការភាព​ផ្នែក​លូត​លាស់ និង​ពី​អ្នក​ដែល​​មាន​និង​គ្មាន​លក្ខណៈ​សម្បត្តិ​គ្រប់គ្រាន់​ដើម្បី​ទទួល​បាន​សេវាពី​មជ្ឈមណ្ឌល​ថ្នាក់​តំបន់។
• មាត្រា 10 មាន​ព័ត៌​មាន​លម្អិត​​អំពីដំណើរ​ការ​ប្តឹង​ជំទាស់។

ឯកសារ​បន្ថែម N មាន​ពេលវេលាកំណត់ពី​ជំហាន​សំខាន់ៗ​នៅ​ក្នុង​ដំណើរ​ការ​ប្តឹង​ជំទាស់ និង​ពី​របៀប​ដាក់បណ្តឹង​ជំទាស់​របស់អ្នក។

(3.14) តើ​ខ្ញុំអាច​ដាក់​ពាក្យ​ស្នើ​សុំ​ឡើង​វិញ​បានទេ ប្រ​សិន​បើ​ខ្ញុំ​មានព័ត៌​មាន​ថ្មី​អំពី​ពិការភាព​របស់ខ្ញុំ​ ដែល​មជ្ឈមណ្ឌល​ប្រចាំ​តំបន់​​មិន​មាន​នៅ​ពេល​ពួក​គេ​បដិសេធខ្ញុំ?

ប្រ​សិន​បើ​មជ្ឈមណ្ឌល​ថ្នាក់​តំ​បន់​បាន​និយាយ​ថា​អ្នក​មិន​មាន​ពិការភាព​ផ្នែក​លូត​លា​​ស់​ទេ ប៉ុន្តែ​អ្នក​មាន​ព័ត៌​មាន​ថ្មី​ (ដូច​ជាលទ្ធផល​ធ្វើ​តេស្ត​ថ្មី) អ្នក​អាច​ដាក់​ពាក្យ​ស្នើ​សុំជា​​ថ្មី​​ម្តង​ទៀតបាន។ មជ្ឈមណ្ឌលថ្នាក់​តំ​បន់​ត្រូវ​ពិចារណា​ទៅ​លើ​ព័ត៌​មាន​ថ្មី​ដែល​អ្នក​ផ្តល់​​​​ដល់​ពួកគេ ដោយ​ឆ្លង​កាត់​​ដំណើរការ​ពិនិត្យ​ទៅ​លើ​លក្ខណៈ​សម្បត្តិ​ឡើងវិញ។ ពួក​គេ​នឹង​មើលព័ត៌​មានពីមុន​មក​និង​ព័ត៌​មាន​ថ្មីៗ​ដែល​អ្នក​ផ្តល់​​ឱ្យ​ពួក​គេ។ ពួក​គេ​អាច​សម្រេច​ធ្វើ​តេស្ត​ជា​ច្រើន​បន្ថែម​ទៀត។ មជ្ឈមណ្ឌលថ្នាក់​តំ​បន់​​នឹង​ចាំ​បាច់​ត្រូវ​ផ្តល់​ដល់អ្នក​នូវ​ការ​សម្រេច​ចិត្ត​មួយ​ទៀត​ជា​លាយលក្ខណ៍​អក្សរ។ មជ្ឈមណ្ឌលថ្នាក់​តំ​ប​ន់​​អាច​មិន​ចង់​ពិនិត្យ​តាម​ដំណើរការឡើង​វិញ​ដោយ​ផ្អែក​លើ​លទ្ធផល​ការ​ធ្វើ​តេស្តថ្មី ប្រ​សិន​បើ​ពួក​គេ​ថ្មីៗ​នេះ​បាន​សម្រេច​ថា​អ្នក​មិន​មាន​ពិការភាព​ផ្នែក​ការ​លូតលាស់ទេនោះ។ ដូច្នេះ ប្រ​សិន​បើ​អ្នក​ត្រូវការ​ការ​វាយតម្លៃ​ដោយ​ឯករាជ្យ​មួយ​ដើម្បី​បង្ហាញ​ពី​ពិការភាព​ផ្នែក​ការ​លូត​លាស់​របស់អ្នក​ សាក​ល្បង​រក​ឲ្យ​បាន​​និង​ដាក់បញ្ជូន​លទ្ធផ​ល​នោះ​​ជា​ផ្នែក​មួយ​នៃ​ការ​ដាក់​ពាក្យ​សុំ​ជា​លើក​ដំបូង​របស់អ្នក។​

(3.15) ប្រ​សិន​បើខ្ញុំ​ត្រូវបានគេរកឃើញ​ថា​មាន​លក្ខណៈ​សម្ប​ត្តិគ្រប់គ្រាន់​ដើម្បី​ទទួល​បាន​សេវាកម្ម​ពី​មជ្ឈមណ្ឌលថ្នាក់​តំបន់នោះ តើ​អ្វី​នឹងកើតឡើង​បន្ទាប់ពីនេះ?

មជ្ឈមណ្ឌលថ្នាក់​តំ​បន់​មាន​រយៈពេល​ 60ថ្ងៃ​ ក្រោយការវាយតម្លៃ​របស់​អ្នក​ត្រូវបញ្ចប់​ដើម្បី​បញ្ចប់​ផែនការ​កម្មវិធី​បុគ្គលរបស់អ្នក​ (IPP)។ [[ផ្នែក​ 4646(c).]] មជ្ឈមណ្ឌល​ក្នុង​តំបន់នឹង​សហការ​ជាមួយអ្នក​និង​គ្រួសារ​របស់អ្នក​ (ប្រសិនបើ​សមស្រប) ដើម្បី​បង្កើត​កម្មវិធី IPP។ IPP របស់អ្នក​សំខាន់​ណាស់​ប្រ​សិន​បើ​វា​រាយ​ពី​សេវាកម្ម​ទាំង​ឡាយ​ដែល​អ្នក​នឹង​ទទួល​បាន​នោះ។ វា​ដូច​ជា​កិច្ចសន្យា​រវាង​អ្នក​និង​មជ្ឈ​មណ្ឌលថ្នាក់​តំបន់អ៊ីចឹង​ដែរ។ វា​រៀប​រាប់​ពី​សេវាកម្ម​និងការគាំពារ​ទាំង​ឡាយ​ដែល​មជ្ឈ​មណ្ឌល ​ថ្នាក់​តំ​បន់​នឹង​បង់ឱ្យ​អ្នក ឬ ជួយ​រក​ឱ្យ​អ្នក។ នៅពេលណាសេវា​ត្រូវបាន​សរសេរ​ចូល​នៅក្នុង​កម្មវិធី IPP របស់អ្នក​ ពេលនោះ​មជ្ឈមណ្ឌលថ្នាក់​តំ​បន់​ត្រូវតែ​អនុវត្ត​កម្មវិធី​ IPP​ ដោយផ្តល់​ជូន​ ឬ​ទូទាត់ប្រាក់សម្រាប់​សេវា​កម្ម​នោះ​​ [[សមាគមសម្រាប់​ពលរដ្ឋ​ដែលមានការលូតលាស់យឺតយ៉ាវ​ ទល់នឹង​ ផ្នែក​សេវា​កម្មលូតលាស់​ (1985) 38 Cal.3d 385, 390.]]

(3.16) ប្រ​សិន​បើ​ខ្ញុំ​​មាន​លក្ខណៈ​សម្បត្តិគ្រប់គ្រាន់​ទទួល​បាន​សេវាកម្ម​ពី​មជ្ឈមណ្ឌល​ថ្នាក់​តំ​បន់​ តើខ្ញុំ​នឹងនៅទទួល​បាន​ជា​រៀងរហូត​ដែរ​ឬទេ?

បុគ្គល​ដែល​ត្រូវ​បាន​កំណត់​ដោយ​មជ្ឈ​មណ្ឌល​ថ្នាក់​តំបន់​ណា​មួយ​ ថា​មាន​​ពិការភាព​ ផ្នែក​ការលូតលាស់ហើយ ជាធម្ម​តា​លក្ខណៈសម្បត្តិ​ត្រូវ​ទទួលបាននឹង​ស្ថិត​នៅ​មួយ​ជីវិត។ ច្បាប់និយាយថា មជ្ឈមណ្ឌលថ្នាក់​តំ​បន់​អាច​បញ្ឈប់​សេវារបស់អ្នក​បាន តែក្នុង​ករណី​ដែល​វាធ្វើ “ការវាយ​តម្លៃ​ពេញលេញ​ឡើង​វិញ” និង​និយាយ​ថា​ការ​សម្រេច​ចិត្តដើម​​របស់​មជ្ឈមណ្ឌល​ដែល​ថាអ្នក​មាន​ពិការភាព​ផ្នែក​ការ​លូតលាស់គឺ​ជា “កំហុស​យ៉ាង​ច្បាស់” (ខុស)។ [[ផ្នែក​ 4643.5(b).]]

(3.17) តើ​អ្នក​សម្របសម្រួល​សេវាជានរណា?

អ្នក​សម្រប​សម្រួល​សេវា​ជា​មនុស្ស​សំខាន់​ខ្លាំង​ណាស់។ ពួក​គេ​ជាមនុស្ស​ដែល​អ្នក​ត្រូវ​ទំនាក់ទំនង​នៅ​មជ្ឈមណ្ឌល​ថ្នាក់​តំបន់ នៅពេលដែល​អ្នក​មាន​លក្ខណៈ​សម្បត្តិ​គ្រប់គ្រាន់​ហើយ។ ពួក​គេ​ពេល​ខ្លះ​មាន​ឈ្មោះ​ថា អ្នក​គ្រប់​គ្រង​ករណី ឬ ជា​បុគ្គលិក​សង្គម​កិច្ច។

អ្នក​សម្រប​សម្រួល​សេវា​របស់​អ្នក ជួយ​ដល់​អ្នក​រៀប​ចំ​ IPP របស់​អ្នក និង​ស្វែង​រក​សេវាកម្ម​ទាំង​ឡាយ​ដែល IPP កំណត់ថាអ្នក​ត្រូវ​ការ។ សេវាកម្ម​ទាំងនេះ​រាប់​បញ្ចូល​ទាំង​សេវា​ផ្តល់ដោយ​មជ្ឈ​មណ្ឌល​ថ្នាក់​តំបន់ និង​សេវាផ្តល់​ទីភ្នាក់​ងារ​ផ្សេង​ទៀត។​ [[ផ្នែក​ 4647(a)&(b).]] បើ​ទោះ​បី​ជា​អ្នក​និយាយ​ទៅ​កាន់​អ្នក​ផ្សេង​ធ្វើ​ការ​នៅ​មជ្ឈ​ម​ណ្ឌ​ល​ថ្នាក់​តំ​បន់​ក៏​ដោយ ក៏​អ្នក​សម្រប​សម្រួល​សេវាកម្ម​របស់​អ្នក​គឺ​ជា​បុគ្គល​ដែល​អ្នក​ត្រូវ​និយាយ​ជា​មួយ​ច្រើន​បំផុត។

ច្បាប់ Lanterman ចែងថា អ្នក សមាជិក​គ្រួសារ ឬ អ្នក​មើល​ថែទាំ អាច​ធ្វើ​ការងារ​ជា​អ្នក​សម្រប​សម្រួល​សេវាកម្ម​បាន។ ប៉ុន្តែ អ្នក​ត្រូវ​តែ​ទទួល​ការ​ឯកភាព​ពី​មជ្ឍមណ្ឌល​ថ្នាក់​តំបន់សិន។​ ប្រ​សិន​បើ​នាយក​ឯកភាព មជ្ឈមណ្ឌលថ្នាក់​តំ​បន់​​ត្រូវ​តែ​ផ្តល់​ឱ្យ​អ្នក ឬ បុគ្គល​ដែល​ដើរតួ​ជា​អ្នកសម្រប​សម្រួល​សេវាកម្ម​របស់អ្នក នូវ​ការ​បណ្តុះ​បណ្តាល និង​ជំនួយនានា។ [[ផ្នែក​ 4647(c) និង (e).]]

(3.18) តើ​ខ្ញុំ​អាច​ប្តូរ​អ្នក​សម្រប​សម្រួល​សេវាកម្ម​របស់​ខ្ញុំ​បានទេ​ប្រសិន​បើ​ខ្ញុំ​ចង់?​

ការងារ​របស់អ្នកសម្របសម្រួល​សេវា​​ គឺ​មានសារៈសំខាន់​ណាស់​។ [[ផ្នែក​ 4647(b).]] ច្បាប់ Lanterman ចែងថា​ គ្មានបុគ្គលណាម្នាក់​អាច​បន្ត​ធ្វើជា​អ្នកសម្របសម្រួល ​សេវារបស់អ្នក​​បានឡើយ​ លើកលែង​តែ​អ្នកយល់ស្រប​។ [[ផ្នែក​ 4647(b). ]] ដូច្នេះ អ្នក​អាច​ស្នើសុំ​អ្នក​សម្រប​សម្រួល​សេវាកម្ម​ថ្មី​ប្រ​សិន​បើ​អ្នក​មិន​សប្បាយ​ចិត្ត​​ជា​មួយ​នឹង​អ្នក​សម្រប​សម្រួល​បច្ចុប្បន្ន​របស់​អ្នក​នោះ។ ប្រ​សិន​បើ​មជ្ឈមណ្ឌល​ថ្នាក់​តំបន់​ចង់​ផ្លាស់ប្តូរ​អ្នក​សម្រប​សម្រួល​សេវា​កម្មរបស់អ្នក​ជា​អចិន្ត្រៃយ៍​នោះ ពួក​គេ​ត្រូវ​តែ​ ផ្តល់​នូវ​ការ​ជូន​ដំណឹង​ជា​លាយលក្ខណ៍​អក្សរ​ដល់អ្នក​ក្នុង​រយៈពេល 10ថ្ងៃ​នៃ​ថ្ងៃ​ធ្វើការ។ [[ ផ្នែក​ 4647(b).]]

(3.19) តើ​ធ្វើ​ដូចម្តេច​ប្រ​សិន​បើ​ខ្ញុំ​ប្តូរទីលំនៅ​ទៅ​កាន់​តំបន់ផ្សេងក្នុង​រដ្ឋ ដែល​ស្ថិត​នៅ​ឆ្ងាយ​ពី​មជ្ឈ​មណ្ឌល​ថ្នាក់តំបន់របស់ខ្ញុំនោះ?

នៅពេលដែលអ្នក​ក្លាយ​ជា​អតិថិជន​របស់​មជ្ឈ​មណ្ឌល​ថ្នាក់​តំបន់​ហើយ​នោះ អ្នក​គឺ​ជា​ផ្នែក​មួយ​នៃ​ប្រព័ន្ធ​មជ្ឈ​មណ្ឌល​ថ្នាក់​តំបន់​ទូទាំងរដ្ឋ។ ប៉ុន្តែ អ្នក​នឹង​ទទួល​បាន  ​សេវាកម្ម​ពី​មជ្ឈ​មណ្ឌល​ថ្នាក់​តំបន់​សម្រាប់​តំ​បន់​ដែល​អ្នក​កំពុង​រស់នៅ។ ប្រ​សិន​បើ​អ្នក​ប្តូរ​ទីតាំង​ទៅ​ក្រៅ​តំបន់​ មជ្ឈមណ្ឌលថ្នាក់​តំ​បន់​ផ្សេង​នឹង​ទទួល​ខុស​ត្រូវ​សម្រាប់​សេវាកម្ម​របស់អ្នក។​ [[ផ្នែក​ 4643.5(a).]]

នៅពេល​អ្នក​ប្តូរ​ទី​តាំង ផែនការកម្ម​វិធី​លក្ខណៈបុគ្គល​ (IPP)​ របស់អ្នក​នៅ​តែ​មាន​ ប្រ​សិទ្ធ​ភាព​ជា​មួយ​នឹង​កម្រិត​សេវាកម្ម​​និង​ការ​គាំ​ពារ​ដដែល​រហូត​ទាល់​តែ​អ្នក​ឯកភាព ​ទៅ​នឹង​ IPP ថ្មី។ ប្រ​សិន​បើ​សេវាកម្ម ឬ ការគាំពារដែល​អ្នក​មាន​នៅមុនពេល​អ្នក​បា​ន​ប្តូរ​ទី​តាំងមិន​មាន​នៅ​ឯមជ្ឈមណ្ឌល​ថ្នាក់​តំបន់ថ្មី​ទេនោះ​ ការប្រជុំ​មួយ​ត្រូវ​តែ​ធ្វើ​ឡើង​ក្នុង​រយៈ​ពេល​ 30ថ្ងៃ ដើម្បី​ឯកភាព​ទៅ​នឹង IPP ថ្មី។ រហូត​ទាល់​តែ IPP ថ្មី​ត្រូវ​បាន​អនុម័ត មជ្ឈមណ្ឌលថ្នាក់​តំបន់​​ត្រូវ​តែ​ផ្តល់​ដល់អ្នក​នូវ​សេវានិង​ការ​គាំពារ​ជំនួស​ដែល​ឆ្លើយ​តប​បំផុត​ទៅ​នឹងគោល​ដៅ IPP របស់អ្នក​នៅ​ក្នុង​ការកំណត់មួយ​ដែល​មិន​សូវតឹងតែង។​ [[ផ្នែក​ 4643.5(c).]]

មជ្ឈមណ្ឌលថ្នាក់​តំ​បន់​មិន​អាច​និយាយថាអ្នក​ត្រូវ​តែ​រង់ចាំ​សេវាកម្ម​បាន​ទេ។ ពួក​គេ​មិនអាច​និយាយ​ថា​អតិថិជន​បច្ចុប្បន្ន​របស់​មជ្ឈមណ្ឌល​ថ្នាក់​តំបន់ថ្មី​មាន​អាទិភាពទទួល​បាន​​មុននោះទេ។ អ្នក​មាន​សិទ្ធិ​ទទួល​បាន​សេវាកម្មនិង​ការគាំពារ​ដូចគ្នា​ទៅ​នឹង​អតិថិជន​ដទៃ​ផ្សេងទៀត​ដែរ​នៅ​ក្នុង​តំបន់​មជ្ឈមណ្ឌល​ថ្នាក់តំបន់ថ្មី​នោះ​ដែរ បើទោះបីជា​មាន​ការ​មិន​ឯកភាព​អំពី​កា​រផ្ទេរករណី​របស់អ្នក​ក៏ដោយ។ នៅក្នុង​ករណី​ដ៏កម្រ​មួយចំនួន អ្នកអាច​បន្ត​ស្ថិត​នៅជា​អតិថិជន​របស់​មជ្ឈមណ្ឌល​ក្នុង​តំបន់បច្ចុប្បន្ន​​របស់​អ្នក​ ក្រោយ​ពេល​អ្នក​ប្តូរទីលំនៅទៅក្រៅ​តំបន់ដែល​បម្រើសេវា​ដោយ​មជ្ឈមណ្ឌល​ ក្នុងតំបន់ផ្សេងទៀត​ [[ក្នុង ​In the Matter of P.F. and D.B., OAH L, OAH L-2001120516 និង L-2001120517,អតិថិជន​របស់​មជ្ឈមណ្ឌល​ថ្នាក់​តំបន់​ពីរនាក់ ដែលពួក​គេ​ជា​មនុស្ស​ស្គាល់គ្នា​អស់រយៈ​ពេល 35ឆ្នាំ ហើយ​បាន​រស់​នៅ​ជា​មួយ​គ្នា​អស់​រយៈពេល 8ឆ្នាំ ត្រូវ​បាន​បង្ខំ​ឲ្យ​ប្តូរ​ទៅ​កាន់​តំ​បន់​មជ្ឈមណ្ឌល​ថ្នាក់​តំ​បន់​មួយ​ទៀតដោយសារតែ​​មិន​មាន​លទ្ធភាព​ជួល​ផ្ទះ​នៅ​ក្នុង​តំ​បន់​ដែល​មជ្ឈ​មណ្ឌល​ថ្នាក់​តំបន់​ចាស់​របស់​គូស្មាមីភរិយានោះ។​ ចៅក្រម​​នីតិ​រដ្ឋបាល​ (ALJ) បាន​សម្រេចថា គូស្វាមីភរិយាទាំងពី​រមិន​ត្រូវ​ប្តូរ​មជ្ឈមណ្ឌល​ថ្នាក់​តំបន់​របស់គេ​ទេ។​ នៅក្នុង​ In the Matter of S.B., OAH L-1998080340, ចៅ​ក្រម​ ALJ លើក​ហេតុផលថា ស្រ្តី​មាន​វ័យ 25 ដែល​ជាអតិថិជន​របស់​មជ្ឈមណ្ឌល​ថ្នាក់​តំបន់ East Los Angeles Regional Center តាំង​ពីវ័យ 4ខែមកនោះ មិន​ត្រូវ​ឲ្យ​ករណី​របស់​នាង​ផ្ទេរ​ទៅ​កាន់​មជ្ឈមណ្ឌល​ថ្នាក់​តំបន់ Harbor Regional Center គ្រាន់​តែ​ដោយ​សារ​អតិថិជន​នោះ​បាន​ប្តូរ​ទី​តាំង ​ពី​ផ្ទះ​របស់ឪពុកនាង​ទៅ​កាន់​ផ្ទះ​ម្តាយ​របស់​នាង ដែល​ជា​ចំណុច​គ្រាន់​តែជា​​ព្រំប្រទ​ល់ប៉ុណ្ណោះនោះ​ទេ។​]]

(3.20) ប្រ​សិន​បើ​ខ្ញុំ​ប្តូរ​ទៅ​កាន់​តំបន់ផ្សេង​នៅ​ក្នុង​រដ្ឋ តើមជ្ឈមណ្ឌល​ថ្នាក់​តំបន់ថ្មី​នឹង​ធ្វើ​ការរួម​គ្នា​ដើម្បី​ជួយ​ដល់ខ្ញុំ​​ក្នុ​ង​ការ​ប្តូរ​ទៅ​កាន់​មជ្ឈមណ្ឌល​ថ្នាក់​តំបន់ថ្មី​ដែរឬទេ?

មជ្ឈមណ្ឌលថ្នាក់​តំ​បន់​​ត្រូវ​តែ​សហការគ្នា​ដើម្បី​ឲ្យ​ប្រាកដ​ថា​​ការផ្ទេររបស់​​អ្នក​​ទៅកាន់​មជ្ឈមណ្ឌល​ក្នុងតំបន់​ថ្មី​ប្រព្រឹត្តទៅដោយរលូន​ ដោយគ្មានការពន្យារពេល​ឬ​ភាព​ខ្វះចន្លោះ​នៅក្នុងសេវា​របស់អ្នក​។ [[ផ្នែក​ 4643.5(c).]] នាយកដ្ឋានសេវាសម្រាប់ ការលូតលាស់ (DDS)​ បានបង្កើត​ “គោលការណ៍​ការណែនាំស្តីពីការផ្ទេរអតិថិជន​អន្តរ​​មជ្ឈមណ្ឌល​” ដែល​ចែង​ថា​ មជ្ឈមណ្ឌលក្នុងតំបន់​ អតិថិជន គ្រួសារ​ និងអ្នក  ផ្តល់សេវា​ គួរតែ​សហការ​គ្នា​មុនពេល អំឡុងពេល​ និងក្រោយពេល​អ្នកផ្លាស់ប្តូរទី លំនៅ។ [[មើល​ ឯកសារ​បន្ថែម G ចំពោះ​សៀវភៅណែនាំ​នេះ​។]]

អ្នក​ដែល​ប្តូរ​ពី​មណ្ឌល​មួយ​ទៅ​មណ្ឌល​មួយ​ទៀត គួរ​មាន​ឱកាសដូចគ្នា​ដើម្បី​ទទួល​បាន​សេវាកម្ម​​ពី​មជ្ឈមណ្ឌល​ថ្នាក់​តំបន់ថ្មី​ ដូចគ្នា​ទៅ​នឹង​អតិថិជន​កំពុង​ទទួលសេវា​នៅ​ទីនោះ​ដែរ។​ [[ឯកសារ​បន្ថែម​ G, គោលការណ៍ណែនាំ 7.]]

ប្រ​សិន​បើ​អ្នក​នឹង​ប្តូរ​ទៅ​រស់នៅ​ក្នុង​តំបន់ថ្មី សូមស្នើ​​សុំ​​មជ្ឈមណ្ឌល​ថ្នាក់​តំ​បន់​របស់អ្នក​​ឲ្យ​មាន “ការប្រជុំ​ធ្វើ​ផែនការមុន​ពេល​​ផ្ទេរ” មួយ​ឱ្យ​បាន​ឆាប់​តាម​តែ​អាច​ធ្វើ​ទៅ​ បាន។​ [[ឯកសារ​បន្ថែម​ G, ​គោលការណ៍ណែនាំ 1.]] មជ្ឈមណ្ឌលថ្នាក់​តំ​បន់​បច្ចុប្បន្នរបស់អ្នក មជ្ឈមណ្ឌលថ្នាក់​តំ​បន់​ថ្មី​របស់អ្នក និង​អ្នក​សម្រប​សម្រួល​សេវាកម្ម​របស់អ្នក នឹង​ចូល​រួម​ក្នុង​កិច្ច​ប្រ​ជុំ​នេះ​ដើម្បី​សម្រេច៖

• តើនរណា​ទទួល​ខុសត្រូវ​សកម្ម​ភាព​ផ្ទេរជាក់លាក់ណាមួយ​
• ការទទួល​ខុស​ត្រូវ​ជាក់លាក់​ណាមួយ និង​
• នៅពេល​ដែល​សកម្ម​ភាព​ផ្ទេរ​ត្រូវ​ធ្វើឡើង។ [[ឯកសារបន្ថែម​ G, គោលការណ៍ណែនាំ​ 2.]]

ការប្រជុំ​ធ្វើផែនការមុន​ពេលផ្ទេរ គួរតែ​ប្រាកដថា​អ្នក​មិន​មាន​ចន្លោះ​នៅ​ក្នុង​សេវាកម្មនិង​ការគាំពារ ដូចជា​ការថែទាំទារក ការគាំពារផ្នែក​អាកប្បកិរិយា និង​សេវាគាំពារការរស់នៅ។

សម្រាប់​កុមារ​ដែលស្ថិត​ក្រោមការថែទាំពី​អ្នក​ដទៃ ឬ មិន​ស្ថិតក្រោម​ការ​ថែទាំ​តាម​ផ្ទះនោះ មន្ត្រី​ខោនធី​និង​មជ្ឈមណ្ឌល​ត្រូវ​តែផ្តល់​ការ​ខិត​ខំជាពិសេសដល់ពួកគេ។ ពួកគេ​ត្រូវ​ប្រាកដថា សំណុំឯកសារទាំង​ឡាយ​ត្រូវ​បាន​ផ្ទេរ​ ហើយ​សេវាកម្ម​ទាំង​ឡាយ​បន្ត​ផ្តល់​ដល់​កុមារទាំងនេះ​ នៅពេល​ដែល​ពួកគេ​ផ្ទេ​រ​ពី​មណ្ឌល​មួយ​ទៅ​មណ្ឌល​មួយ​ទៀត​នោះ។ [[ផ្នែក​ 4643.5(d).]]

(3.21) តើ​នរណា​បង់ថ្លៃសេវាកម្ម​ក្នុង​អំឡុង​ពេល​ផ្ទេរ​ពី​មជ្ឈមណ្ឌល​ថ្នាក់​តំបន់មួយ​ទៅ​មួយ​ទៀត?

មជ្ឈមណ្ឌលថ្នាក់​តំ​បន់​បច្ចុប្បន្ន​របស់អ្នកនឹង​បន្ត​បង់ថ្លៃ​សេវាកម្ម​ទាំង​ឡាយ (និង​គ្រប់គ្រង​ករណី​របស់អ្នក)​ រហូត​ដល់៖

• អ្នក​មាន​ IPP ថ្មី (ឬ ផែនការសេវាកម្ម​គ្រួសារ​ជាលក្ខណៈបុគ្គល​ (IFSP) សម្រា​ប់​កុមា​រ​អាយុ​ក្រោម​បី​ឆ្នាំ) ហើយ​
• មជ្ឈមណ្ឌលថ្នាក់​តំ​បន់​ថ្មី​នឹង​ផ្តល់​សេវាកម្ម។ [[ឯកសារ​បន្ថែម​ G, គោលការណ៍ ណែនាំ​ 1.]]

(3.22) តើទំនាស់​កើតឡើង​ជាមួយ​នឹង​មជ្ឈមណ្ឌល​ថ្នាក់តំបន់ ពីការ​ប្តូរ​ទី​លំនៅ​ត្រូវ​បាន​ដោះស្រាយ​ដោយ​របៀប​ណា?​

មជ្ឈមណ្ឌលក្នុងតំបន់​គួរតែ​ព្យាយាមដោះស្រាយ​បញ្ហាវិវាទ​នៃ​រាល់​ការ​ផ្ទេរ​ទាំងអស់​រវាងពួកគេ​ផ្ទាល់​។ [[ឯកសារ​បន្ថែម​ G, កិច្ច​ដំណើរការដោះស្រាយ​វិវាទ​ 1.]] ប្រសិ​នបើពួកគេ​មិន​អាច​ដោះស្រាយ​បានទេ មជ្ឈមណ្ឌលក្នុងតំបន់​ឬអ្នក (ឬអ្នកតំណាង​ដែល​អ្នក​បាន​អនុញ្ញាត​​) អាចសុំ​នាយកដ្ឋាន​សេវា​សម្រាប់ការលូតលាស់​ (DDS) នូវ​ជំនួយ​ជា​លាយលក្ខណ៍​អក្សរ​។ [[ឯកសារ​បន្ថែម​ G, កិច្ច​ដំណើរការ​ដំណោះស្រាយ​វិវាទ​ 2-3.]] ផ្ញើលិខិត​មួយច្បាប់​ទៅកាន់មជ្ឈមណ្ឌល​ក្នុងតំបន់ទាំងពីរ​។ [[ឯកសារ​បន្ថែម​ G​, កិច្ច​ដំណើរការ​ដោះស្រាយវិវាទ​ 3.]] ព័ត៌​មាន​ទំនាក់ទំនង​ទៅកាន់​អនុប្រធា​ននាយកដ្ឋាន (DDS) នៃ​ផ្នែក​សេវាសហគមន៍​និង​ការ​គាំពារ​គឺ៖

1600 9th Street, MS 3-24
Sacramento, CA 95814
ទូរសព្ទ៖ (916) 654-2716

DDS នឹង​ផ្តល់​មជ្ឈមណ្ឌលថ្នាក់​តំបន់​នី​មួយៗ​នូវ​រយៈ​ពេល 5ថ្ងៃដើម្បី​ពន្យល់​ពីជំហរ​របស់ខ្លួន​ជា​លាយលក្ខណ៍​អក្សរ។ បន្ទាប់​មក ​អនុប្រធាននាយកដ្ឋាន នឹង​សរសេរ​លិខិត​ផ្តល់យោបល់​ក្នុង​រយៈ​ពេល 30ថ្ងៃ ​ក្រោយពី​ពួក​គេ​ទទួល​បាន​ព័ត៌​មាន​ដែល​គេ​ត្រូវការ។ [[ឯកសារបន្ថែម​ G, កិច្ច​ដំណើរការ​ដោះស្រាយវិវាទ​ 4-5.]]

រហូត​ដល់​ភាពចម្រូង​ចម្រាស់​ត្រូវ​បាន​ដោះ​ស្រាយ មជ្ឈមណ្ឌលថ្នាក់​តំ​បន់​បច្ចុប្បន្ន​របស់អ្នកនឹង​បន្ត​បង់ថ្លៃ​សេវាកម្ម​ទាំង​ឡាយរបស់អ្នក​ និង​គ្រប់គ្រង​ករណី​របស់អ្នកដដែល​។ អ្នកមិន​គួរ​មិនទទួលបាន​សេវាកម្ម​​ដោយសារតែ​វិវាទ​រវាង​មជ្ឈមណ្ឌល​ក្នុង​តំបន់នោះទេ​។ [[ផ្នែក​ 4643.5(c) និង​ ឯកសារ​បន្ថែម​ G, គោលការណ៍ណែនាំ​ 5, 6, និង​ 8.]]

(3.23) តើកម្មវិធី​ស្វ័យសម្រេចគឺជាអ្វី​?

កម្មវិធីស្វ័យសម្រេច​ (SDP) គឺ​ជាវិធី​មួយ​ក្នុងការ​ទទួលបាន​សេវា​មជ្ឈមណ្ឌលក្នុងតំបន់​របស់អ្នក​។  [ផ្នែក​ 4685.8] ខុសពី​វិធី​ចាស់​ៗ​ ដែល​មជ្ឈមណ្ឌល​ក្នុងតំបន់​ទិញ​សេវា​របស់អ្នក​ពី​អ្នកលក់របស់ខ្លួន​។ នៅក្នុង​ SDP អ្នកប្រើប្រាស់​សេវា​​ និង​ក្នុងគ្រួសារ​ពួកគេ​​មាន​សេរីភាព​ ការគ្រប់គ្រង និង​ការទទួល ខុសត្រូវ​ច្រើនជាងមុន​ក្នុងការ​ជ្រើសរើសសេវា​​និងការគាំទ្រ​​ ដើម្បី​ជួយ​ពួកគេ​ឲ្យ​សម្រេចបាន វត្ថុបំណង​នៅក្នុង ផែនការ​កម្មវិធី​សម្រាប់បុគ្គល​របស់ពួកគេ​ (IPP)។ មកត្រឹម​ខែ​កក្កដា ឆ្នាំ​2021 SDP មានផ្តល់ជូន​ដល់​រាល់​អ្នកប្រើប្រាស់សេវា​ទាំងអស់​របស់​មជ្ឈមណ្ឌល​ក្នុង​តំបន់​​​​ដែលមានសិទ្ធិទទួលបាន។ មជ្ឈមណ្ឌល​ក្នុងតំបន់នីមួយៗ​មាន​គណៈកម្មាធិការ​ប្រឹក្សា​យោបល់​តាមមូលដ្ឋាន​ដែលជួបប្រជុំ​ដើម្បី​ជួយ​ធ្វើផែនការ​ SDP នៅក្នុង​តំបន់នោះ។

នៅក្នុង​ SDP អ្នក​ត្រូវ៖ 

• បង្កើតផែនការដែលផ្តោត​លើបុគ្គល​ ដើម្បី​ធ្វើការងារ​ឆ្ពោះទៅរក​អនាគត​តាមការចង់បានរបស់ អ្នក​។ នៅអំឡុង​កិច្ច​ដំណើរការ​បង្កើត​ផែនការ​ដែលផ្តោត​លើបុគ្គល​ អ្នក​តម្រង់ទិស​ការសន្ទនា​អំពី​ចំណុច​ខ្លាំង សមត្ថភាព ទំនោរ បែបផែនជីវិតរស់នៅ និង​សាវតារវប្បធម៌។ នៅចុងបញ្ចប់ នៃ​កិច្ច​ដំណើរការ​ អ្នកនឹង​មានផែនការ​ជាលាយលក្ខណ៍អក្សរ​មួយសម្រាប់គោលដៅសម្រាប់​សកម្មភាព​កម្សាន្ត​ មធ្យោបាយធ្វើដំណើរ​ មិត្តភាព ការព្យាបាល លំនៅដ្ឋាន​ ការងារ​ ទំនាក់ ទំនង​គ្រួសារ​ និងអ្វីៗផ្សេងទៀត​ដែលអ្នក​ចង់បាន​។​
• នឹង​មាន​ថវិកាសម្រាប់​បុគ្គល​ ដែល​ជា​ទឹកប្រាក់របស់អ្នកដើម្បី​ទិញ​សេវានិងការគាំពារ​របស់អ្នក​។ ក្រុមការងារ​ IPP ធ្វើការសម្រេច​ទៅលើ​ថវិកា​របស់អ្នក​ ផ្អែកលើ​ទឹកប្រាក់​ដែល​អ្នក​បានប្រើប្រាស់​សម្រាប់​សេវា​នៅក្នុង​រយៈពេល 12ខែ​ចុងក្រោយ​បំផុត​។​ បន្ទាប់មក​​ អ្នកនឹង​បង្កើត​ផែនការ​ចំណាយ​ដើម្បី​ចែង​អំពី​របៀបដែលអ្នកនឹងត្រូវចំណាយ​ថវិការបស់អ្នក​ទៅ​លើ​សេវា​នានា​។
• អាច​អនុញ្ញាត​ឲ្យ​​អ្នកសម្របសម្រួលឯករាជ្យ​ជួយអ្នក​ក្នុងការបង្កើត​ផែនការ​ដែលផ្តោត​លើ បុគ្គល ធ្វើការ​សម្រេច​ចិត្ត​អំពី​ថវិកា​និង​ការចំណាយ​របស់អ្នក​ ស្វែងរកសេវា​ និងអ្នកតស៊ូមតិ​សម្រាប់អ្នក​។
• ត្រូវតែ​មាន​សេវា​គ្រប់គ្រង​ហិរញ្ញវត្ថុ​ (FMS)។ អ្នក​ជ្រើសរើស​យក​ FMS ដែលបានលក់ដោយ​មជ្ឈមណ្ឌលក្នុង​តំបន់​។ FMS នឹង​ជួយ​អ្នក​ឲ្យ​គ្រប់គ្រង​ថវិកា​របស់អ្នក​តាមរយៈការបង់​ទូទាត់​វិក្កយបត្រ​ និងការគ្រប់គ្រង​ប្រាក់ខែ​សម្រាប់​បុគ្គលិក​គាំពារ​។
• ស្វែងរក​អ្នកផ្តល់សេវា​សម្រាប់​សេវាកម្មនិង​ការ​គាំទ្រនានា​។ ពួកគេ​មិនចាំបាច់​ទាល់តែជា​អ្នក​លក់​នៃ​មជ្ឈមណ្ឌល​ក្នុងតំបន់ទេ​ ដូចដែល​ពួកគេអនុវត្ត​នៅក្នុង​ប្រព័ន្ធចាស់​នោះទេ​។ អ្នកអាច​ទិញ​សេវា​ដែល​រដ្ឋាភិបាល​សហព័ន្ធ​បាន​ឯកភាព និងដែលបាន​រៀប​រាប់​នៅក្នុង​ការអនុគ្រោះ សិទ្ធិ​ SDP។ មាន​សេវា​ផ្សេងៗ​ជាច្រើន​ដែលអ្នកអាចទិញ​ដោយប្រើ​ថវិកា​របស់អ្នក​។ មាន​សេវា មួយចំនួន​ដែលអ្នកមិនអាច​ទិញ​បាន​ ដូចជា​បន្ទប់​និងចំណីអាហារ (ថ្លៃ​ឈ្នួល​ អាហារ​ និង​សេវា​សាធារណៈ​)។​

ប្រសិនបើ​អ្នក​មិនយល់ស្រប​ជាមួយនឹង IPP របស់អ្នក ថវិកាសម្រាប់បុគ្គល​ ឬ​ផ្នែក​ផ្សេងទៀត​នៃ​សេវា​កម្ម​របស់​​អ្នក​ អ្នកអាចធ្វើឧទ្ធរណ៍​ និង​ស្នើសុំ​ឲ្យការធ្វើសវនាការ​យុត្តិធម៌។ សិទ្ធិ​ប្តឹង​ឧទ្ធរណ៍​និង​សវនាការរបស់អ្នក​ គឺដូចគ្នា​នៅក្នុង​ SDP ដូចមាន​នៅក្នុង​ប្រព័ន្ធចាស់​នៃ​មជ្ឈមណ្ឌល​ក្នុង​តំបន់​​។ មើល​ ជំពូក​ 10 សម្រាប់​ការប្តឹងឧទ្ធរណ៍​ ការប្តឹងតវ៉ា​ និង​កាលកំណត់​។

សម្រាប់​ព័ត៌មាន​បន្ថែម​អំពី​ SDP សូមចូល​ទៅកាន់គេហទំព័​រ​ SDP របស់នាយកដ្ឋាន​​សេវាផ្នែក​លូតលាស់​នៅទីនេះ​៖ https://www.dds.ca.gov/initiatives/sdp/. ដើម្បី​ចុះ​ឈ្មោះ​ក្នុង SDP​ សូមពិភាក្សា​ជាមួយ​​អ្នកសម្របសម្រួល​សេវា​នៃ​មជ្ឈមណ្ឌល​​ក្នុងតំបន់​របស់អ្នក​។ អ្នក​ត្រូវតែចូលរួម​នៅក្នុង​ការតម្រង់ទិស​ មុនពេល​អ្នក​អាច​ចាប់ផ្តើមកម្មវិធី​​ SDP។ ការតម្រង់ទិស​មាន​ផ្តល់ជូន​តាមរយៈ មជ្ឈមណ្ឌល​ក្នុងតំបន់​ ឬគណៈកម្មាធិការ​ប្រឹក្សា​យោបល់​តាមមូលដ្ឋាន​​ ជាភាសាផ្សេងៗ​។​ អាចនឹង​មាន​ការ​តម្រង់ទិស​ទូទាំង​រដ្ឋ​ដែលអ្នកអាច​ចូលរួមបាន​។