ជំ​ពូក​ 1៖ ច្បាប់ Lanterman៖

(1.1) តើច្បាប់ Lanterman គឺជាអ្វី?

ច្បាប់ Lanterman គឺជាច្បាប់របស់រដ្ឋកាលីហ្វ័រញ៉ា ដែលផ្ដល់ជូន បុគ្គល​ទាំងឡាយដែលមានពិការភាពផ្នែក​លូត​លាស់ នូវសិទ្ធិទទួលបានសេវា​និងជំនួយគាំទ្រដែលពួកគេត្រូវការដើម្បីរស់នៅក្នុងជីវិតធម្មតាដោយឯករាជ្យ។ ច្បាប់នេះ ស្ថិតនៅក្នុងក្រមស្ថាប័ន និងសុខុមាលភាពរដ្ឋកាលីហ្វញ៉ា នៅផ្នែក 4500-4906។ នៅពេលណាក៏ដោយដែលអ្នកឃើញពាក្យ “ផ្នែក” នៅក្នុងសៀវភៅណែនាំនេះ ឬនៅក្នុងព័ត៌មានយោងនៅចុងទំព័រ ដោយពុំមានព័ត៌មានដទៃទៀត ពាក្យនេះ គឺសំដៅទៅលើ ផ្នែកនៅក្នុងច្បាប់ Lanterman ។ ផ្នែក 4512(a) មានន័យថា ព័ត៌មាននេះបានមកពី ផ្នែ​ក​​រង (a) នៃផ្នែក 4512 នៃច្បាប់ Lanterman នៅក្នុង​ក្រមស្ថាប័ន​ និង​សុខុមាលភាព​។​ដើម្បី​អាន​ច្បាប់​ Lanterman សូមចុចត្រង់នេះ។ 

ច្បាប់នេះចែងថា មនុស្សម្នាក់ៗចាំបាច់ត្រូវទទួលបានសេវានិងជំនួយគាំទ្រដែលបំពេញតាមតម្រូវការ និងជម្រើសរបស់ពួកគេ។ ច្បាប់​នេះ​ទទួលស្គាល់​ថា​ មនុស្ស​ដែល​មាន​ពិការភាព​ផ្នែកលូតលាស់​ អាច​នឹង​ត្រូវការ​ជំនួយ​ដើម្បី​បានរស់នៅក្នុងជីវិ​ត​ពេញលេញ​ និង​ប្រកបដោយផលិត​ភាព​។ 

អង្គនីតិប្បញ្ញត្តិ ថ្លែងថា៖

“បណ្ដុំនៃសេវា​និងជំនួយគាំទ្រ គួរត្រូវបង្កើតឡើងឲ្យបានពេញលេញ​គ្រប់គ្រាន់​ដើ​ម្បី​បំពេញតាមតម្រូវការ និងជម្រើសរបស់បុគ្គលម្នាក់ៗ​ដែលមានពិការភាពផ្នែក​លូត​លាស់ ដោយមិនគិតពីអាយុ​ ឬកម្រិតនៃ​ពិការភាព​​នោះឡើយ និងនៅតាមដំណាក់កាលនីមួយៗនៃជីវិត និងដើម្បី​ជួយគាំទ្រ​ការ​ធ្វើសមាហរណកម្ម​របស់​ពួកគេចូលទៅក្នុងជីវិត​ធម្មតា នៅក្នុងសហគមន៍។

(1.2) តើតុលាការកំពូលប្រចាំរដ្ឋកាលីហ្វ័រញ៉ានិយាយអ្វីអំពីច្បាប់ Lanterman?

មានរឿងក្ដីមួយនៅក្នុងឆ្នាំ1985 ហៅថា រឿងក្ដី “សមាគម​សម្រាប់​ប្រជាពលរដ្ឋដែល​មាន​បញ្ញាទន់​ខ្សោយ​ប្រចាំ​រដ្ឋកាលីហ្វ័រញ៉ា (ARC) ទល់នឹង នាយកដ្ឋានសេវាសម្រា​ប់​ការលូតលាស់ (DDS)”។ [[38 Cal.3d 384 (1985).]] ក្នុងករណីនោះ​ តុលាការ​កំពូ​ល​​រដ្ឋកាលីហ្វ័រញ៉ា​​ បានពន្យល់​ពី​គោលបំណង​នៃ​ច្បាប់​ Lanterman និង​របៀប​ដែល​រដ្ឋ​ត្រូវតែ​ជួយដល់​មនុស្ស​ដែលមានពិការភាព​ផ្នែកលូតលាស់​។

តុលាការថ្លែងថា ច្បាប់ Lanterman តម្រូវឲ្យរដ្ឋផ្ដល់ជូននូវ “ឋបនីយភណ្ឌ​​ និងសេវាដែ​លមានលក្ខណៈពេញលេញគ្រប់គ្រាន់ដើម្បីបំពេញតាមតម្រូវការរបស់មនុស្សម្នាក់​ៗដែលមានពិការភាពផ្នែក​លូត​លាស់ ដោយមិនគិតពី​អាយុ​ ឬកម្រិតនៃ[​ពិការភា​ព]​នោះឡើយ និងនៅតាមដំណាក់កាល​នីមួយៗ​នៃជីវិត។"

សេវាដែលត្រូវបានតម្រូវទាំង​នេះ​រួម​មាន៖

• ការកំណត់អត្តសញ្ញាណបុគ្គលទាំងឡាយដែលមានពិការភាពផ្នែកលូតលាស់
• ការវាយតម្លៃអំពីតម្រូវការរបស់ពួកគេ និង
• ការជ្រើសរើស និងផ្ដល់ជូនសេវាដើម្បីបំពេញតាមតម្រូវការ​ជាលក្ខណៈ​បុគ្គលរបស់បុគ្គលម្នាក់ៗ។

តុលាការក៏បានពន្យល់ផងដែរថា គោលបំណងនៃច្បាប់នេះគឺ៖

• កាត់បន្ថយចំនួនបុគ្គលដែលមានពិការភាពផ្នែក​លូត​លាស់​ដែលកំពុង​រស់នៅក្នុងស្ថាប័ននានា និង​កាត់​បន្ថយ​ចំនួនបុគ្គលដែលមានពិការភាពផ្នែកលូតលា​ស់​ដែលត្រូវបានយកចេញ​ពីគ្រួសារ និង​សហគមន៍​របស់​ពួកគេ និង
• បង្កលទ្ធភាពឲ្យបុគ្គលទាំងឡាយដែលមានពិការភាពផ្នែក​លូត​លាស់​ទទួលបា​នជីវិតដូចជាមនុស្ស​ដែលគ្មាន​ពិការភាពដែលមានវ័យដូចគ្នា និងបង្កលទ្ធភាពឲ្យ​ពួកគេរស់នៅក្នុងជីវិតដែលមានផលិតភាព និងកាន់តែ​ឯករាជ្យនៅក្នុងសហគមន៍។

ច្បាប់ Lanterman ចែងថា “រដ្ឋកាលីហ្វ័រញ៉ា ទទួលខុសត្រូវចំពោះ​ប្រជាពលរដ្ឋ​របស់ខ្លួន​ដែលមានពិការភាព​ផ្នែក​លូត​លាស់​ និងមាន​កាតព្វកិច្ច​ដែលត្រូវអនុវត្តដើម្បីជាប្រយោជន៍ដល់អ្នកទាំងនោះ។” [[ផ្នែក​ 4501.]] ច្បាប់ចែងថា​ បុគ្គល​ “ដែលមានពិការភាព​ផ្នែកលូតលាស់​ គឺ​មាន​សិទ្ធិ​ និង​ទំនួលខុសត្រូវ​តាមច្បាប់​ដូចគ្នា​[ទៅនឹង​អ្នក​]ដែ​ល​រដ្ឋ​ធម្មនុញ្ញនិង​ច្បាប់​របស់សហព័ន្ធ ឬ​រដ្ឋ​ធម្មនុញ្ញ​និង​ច្បាប់​របស់​រដ្ឋកាលីហ្វ័រញ៉ា​​បាន​ធានា​ចំពោះ​​បុគ្គល​ផ្សេងទៀត។” [[ផ្នែក​ទី​ 4502.]] ច្បាប់នេះក៏ផ្ដល់ជូនបុគ្គលទាំង​ឡា​យដែលមានពិការភាពផ្នែក​លូត​លាស់​ នូវសិទ្ធិតាមផ្លូវច្បាប់ជាក់លាក់ ដោយរួមមាន សិទ្ធិទទួលបាន​ការព្យាបាល និងស្ដារនីតិសម្បទា ដោយការចំណាយត្រូវរ៉ា​ប់រង​ដោយរដ្ឋ។

(1.3) តើច្បាប់ Lanterman បម្រើ​និងការពារសិទ្ធិ​របស់បុគ្គល​ទាំងឡាយ​ដែលមានពិការភាពផ្នែក​លូត​លាស់ ដោយរបៀប​ណា​?

ច្បាប់នេះចែងថា បុគ្គល​ទាំងឡាយ​ដែលមានពិការភាពផ្នែក​លូត​លាស់ មានសិទ្ធិ​ដូច​ប្រជាជន​នៅ​ក្នុងរដ្ឋកាលីហ្វ័រញ៉ាដទៃទៀត។ [[ផ្នែក 4502(a).]]

ច្បាប់នេះក៏ធានានូវសិទ្ធិដទៃទៀតផងដែរ ដោយរួមមានសិទ្ធិ៖

• ធ្វើការជ្រើសរើសនៅក្នុងជីវិតរបស់អ្នកផ្ទាល់ [[ផ្នែក​ 4502.1.]]
• ទទួលបានព័ត៌មានដែលអ្នកអាចយល់បាន ​ដើម្បីជួយអ្នក​ក្នុងការធ្វើការ​សម្រេ​ច​ចិត្ត  [[ផ្នែក​ 4502.1.]]
• ទទួលបានសេវានិងជំនួយគាំទ្រ ​តាមរបៀបមួយដែលមាន​ការកំហិត​តិចបំផុត ​ដើម្បីជួយអ្នក​បញ្ចេញ​សក្ដានុពល​​របស់អ្នកឲ្យបានល្អបំផុត។ [[ផ្នែក​ 4502(b)(1).]]

នៅក្នុងច្បាប់នេះ អង្គនីតិប្បញ្ញត្តិ សម្រេចថា សេវាដែលបុគ្គល​​ដែលមាន​ពិការភា​ពផ្នែ​ក​លូត​លាស់ត្រូវការ គឺមានលក្ខណៈពិសេស​និងផ្ដាច់មុខ។ ច្បាប់នេះ​ចែងថា ប្រសិនបើសេវានិងជំនួយគាំទ្រទាំងនេះមិនត្រូវបាន​ផ្ដល់ជូន​យ៉ាងល្អដោយ

​ទីភ្នាក់ងារ​រដ្ឋាភិបាលប្រចាំរដ្ឋ នោះទីភ្នាក់ងារឯកជន នៅសហគមន៍​ដែល​មិន​ស្វែងរក​ប្រាក់​ចំណេញ គួរផ្ដល់សេវា​ទាំងនេះ។​ [[ផ្នែក​ 4620(b).]] ច្បាប់នេះ បានបង្កើតប្រព័ន្ធមួយដែលមានមជ្ឈមណ្ឌលតំបន់​ដែលមិនស្វែង​រកប្រាក់ចំណេញចំនួន 21 នៅពាសពេញរដ្ឋកាលីហ្វ័រញ៉ា។ មជ្ឈមណ្ឌលតំបន់នីមួយៗ គឺជាទីភ្នាក់ងារថ្នាក់មូលដ្ឋាន ដែលធានាថា បុគ្គលទាំងឡាយដែលមានពិការភាពផ្នែក​លូត​លា​ស់ ដែលកំពុងរស់នៅ​ក្នុងតំបន់​ទទួលខុសត្រូវ​របស់មជ្ឈមណ្ឌលតំបន់នោះ នឹងទទួលបាន​សេវា​ និងជំនួយគាំទ្រដែលពួកគេត្រូវការ។ ច្បាប់នេះក៏តម្រូវឲ្យនាយកដ្ឋានសេវាសម្រាប់ការលូតលាស់ (DDS) នៃរដ្ឋ​កាលីហ្វ័រញ៉ា ត្រួតពិនិត្យ​មជ្ឈមណ្ឌល​ប្រចាំតំប​ន់ ដើម្បីធានាថាមជ្ឈមណ្ឌល​ទាំងនោះ អនុវត្ត​ច្បាប់នេះនៅក្នុងតំបន់នីមួយៗនៃរដ្ឋកាលីហ្វ័រញ៉ា។ [[ផ្នែក​ 4620.]]

ច្បាប់នេះក៏តម្រូវឲ្យមជ្ឈមណ្ឌលប្រចាំតំបន់ បង្កើតផែនការកម្មវិធី​ដែលមាន​លក្ខណៈ​បុគ្គល (IPP) ដោយផ្អែកលើតម្រូវការរបស់អ្នក។ [[ផ្នែក 4646.]] IPP រៀប​រាប់​អំពី​សេវា​កម្ម​និង​ការគាំទ្រ​ដែលអ្នក ​និង​មជ្ឈមណ្ឌលក្នុងតំបន់​យល់ស្រប​ថាអ្នក​ត្រូវការ​និង​ជ្រើស​រើស​​យក​។​ មជ្ឈមណ្ឌលប្រចាំតំបន់នឹងបង់ប្រាក់ទូទាត់សេវា IPP មួយចំនួន។ មជ្ឈមណ្ឌលប្រចាំតំបន់នឹងចាត់តាំងអ្នកសម្របសម្រួលសេវាម្នាក់សម្រាប់​អ្នក។ បុគ្គលរូបនេះនឹងជួយអ្នកឲ្យ​ទទួលបានសេវាដែលត្រូវបានរៀបរាប់នៅក្នុង IP​P របស់អ្នក។ ច្បាប់នេះផ្ដល់ជូនអ្នកនូវវិធីជាច្រើនដើម្បីអនុវត្តសិទ្ធិរបស់អ្នក ដោ​យរួម​ទាំងសិទ្ធិទទួលបានសេវានិងជំនួយគាំទ្រដែលអ្នកត្រូវការនិងជ្រើសរើស។ នៅ​ពេ​ល​អ្នកស្នើសុំ មជ្ឈមណ្ឌលប្រចាំតំបន់របស់អ្នកឲ្យបង់ប្រាក់ទូទាត់សេវាអ្វីមួយ ដូចជាម៉ោ​ងថែទាំជំនួសច្រើនជាងមុន នេះមានន័យថាអ្នកកំពុង​ស្នើសុំ​មជ្ឈមណ្ឌល​តំបន់របស់អ្នកឲ្យធ្វើការផ្លាស់ប្ដូរ IPP របស់អ្នកដើម្បី​រួមបញ្ចូល​​ម៉ោងថ្មីៗបន្ថែមទៀត។​ ប្រសិ​នបើមជ្ឈមណ្ឌលប្រចាំតំបន់បដិសេធសំណើរបស់អ្នក ហើយអ្នកគិតថា មជ្ឈមណ្ឌ​លប្រចាំតំបន់ធ្វើខុស នោះអ្នកអាចប្ដឹងឧទ្ធរណ៍ជំទាស់នឹងសេចក្ដី សម្រេចនោះបាន។ កិច្ចដំណើរការនៃបណ្ដឹងឧទ្ធរណ៍ ចាប់ផ្ដើមនៅពេលអ្នកស្នើសុំ​ឲ្យមាន​សវនាការប្រកបដោយយុត្តិធម៌មួយ។​ [[ផ្នែក​ 4710 និង​ផ្នែកបន្តបន្ទាប់​]]

វិធីសាស្រ្តម្យ៉ាងទៀតដើម្បីអនុវត្តសិទ្ធិរបស់អ្នក គឺតាមរយៈ​កិច្ចដំណើរការ​បណ្ដឹងតវ៉ា​។ ជូនកាល​ នេះ​ត្រូវបាន​ហៅថា ពាក្យបណ្តឹងផ្នែក 4731។ [[“បណ្ដឹងតវ៉ា ផ្នែក 4731” ត្រូវបានដាក់ឈ្មោះតាម ផ្នែកនៅក្នុងច្បាប់ Lanterman ដែលព័ត៌មានទាក់​ទ​ង​នឹងកិច្ចដំណើរការពាក្យបណ្ដឹងមាននៅក្នុងផ្នែកនោះ។]] អ្នកអាចដាក់ពាក្យប្ដឹងតវ៉ា ប្រសិនបើអ្នកគិតថា មជ្ឈមណ្ឌលប្រចាំតំបន់ ឬទីភ្នាក់ងារណាមួយ​ដែលត្រូវបានឧបត្ថ​ម្ភ ដោយមជ្ឈមណ្ឌលប្រចាំតំបន់ រំលោភសិទ្ធិរបស់អ្នក។ ជាឧទាហរណ៍ ប្រសិ​ន​បើអ្នកសើ្នសុំកិច្ចប្រជុំ IPP មួយ ហើយមជ្ឈមណ្ឌលប្រចាំ​តំបន់ បដិសេធមិនព្រមរៀបចំពេលវេលាដើម្បីរៀបចំកិច្ចប្រជុំនោះ អ្នកអាចដាក់ពាក្យប្ដឹងតវ៉ាបាន។

អ្នកអាចប្រើប្រាស់សេវាតស៊ូមតិឯករាជ្យដើម្បីទទួលបានដំបូន្មាន ឬជំនួយ។

ទីភ្នាក់​ងារទាំងនេះ អាចជួយធ្វើឲ្យអ្នកយល់ដឹង និងអនុវត្តសិទ្ធិរបស់អ្នក៖

• ការិយាល័យការតស៊ូមតិសិទ្ធិរបស់អតិថិជន (OCRA)៖
  • Northern California 1-800-390-7032 (TTY 877-669-6023)
  • Southern California 1-866-833-6712 (TTY 877-669-6023)
• Disability Rights California: 1-800-776-5746

(1.4) តើច្បាប់ Lanterman កំណត់និយមន័យ “សេវានិងជំនួយ​គាំទ្រ” សម្រាប់បុគ្គល​ទាំងឡាយ​ដែលមានពិការភាពផ្នែកលូតលាស់ ដោយរបៀបណា?

“សេវានិងជំនួយគាំទ្រ” មានន័យថាជាជំនួយដែលអ្នកជ្រើសរើសនិងត្រូវការ​សម្រាប់ពិការភាពផ្នែក​លូត​លាស់របស់អ្នក ដើម្បីរស់នៅក្នុងជីវិត​ដែលមាន​​ផលិតភាពពេញលេញនៅក្នុងសហគមន៍។ សេវានិងជំនួយគាំទ្រអាចជួយអ្នកក្នុងការសិក្សារៀនសូ​ត្រ​បំណិនថ្មីៗ កែលម្អ​ការបំពេញមុខងាររបស់អ្នក និងជួយធ្វើឲ្យអ្នករស់នៅក្នុងជីវិតធម្មតា​​និងឯករាជ្យ។ [[ផ្នែក 4512(b).]] ជាឧទាហរណ៍ អ្នកអាចត្រូវការការព្យាបាលស្ដារសកម្មភាព ដើម្បីជួយ​ឲ្យអ្នក​អាចលេបអាហារបាន ដែលនឹងជួយកាត់បន្ថយការពឹងផ្អែករបស់អ្នក​ទៅលើ​បំពង់បញ្ច្រកអាហារ។ ឬ អ្នកអាចត្រូវការការបណ្ដុះបណ្ដាលដើម្បីប្រើប្រាស់ប្រព័ន្ធរថយន្តក្រុងនៅក្នុង​មូលដ្ឋាន។

មជ្ឈមណ្ឌលប្រចាំតំបន់ និងទីភ្នាក់ងារដទៃទៀត ផ្ដល់សេវានិងជំនួយគាំទ្រ​ដោយផ្អែកលើ IPP របស់អ្នក។ មជ្ឈមណ្ឌលប្រចាំតំបន់ បង់ប្រាក់ទូទាត់សេវាមួយចំនួន និងជួយអ្នក​ឲ្យទទួល​បាន​​សេវាមួយចំនួនពីទីភ្នាក់ងារដទៃទៀត។ បើទោះបីជាសេវាឬជំនួយគាំទ្រណាមួយមិនត្រូវបានចែងយ៉ាងជាក់លាក់នៅក្នុងច្បាប់ Lanterman ក៏ដោយ អ្នកនៅតែអាចទទួលសេវាឬជំនួយគាំទ្រ​នោះ ប្រសិនបើអ្នកមានភ័ស្តុតាងបង្ហាញថាអ្នកត្រូវការវា។

(1.5) តើអ្នកណាអាចទទួលសេវានិងជំនួយគាំទ្រនៅក្រោមច្បាប់ Lanterman?

មនុស្សបួនក្រុមអាចទទួលសេវានៅក្រោមច្បាប់ Lanterman៖

1. បុគ្គលដែលបំពេញតាមនិយមន័យពិការភាពផ្នែក​លូត​លាស់របស់ច្បាប់ Lanterman។ [[ផ្នែក​ 4512(a) និង (l).]] អ្នកទាំងនេះគឺជាបុគ្គលដែលមានពិការភាពធ្ងន់ធ្ងរ ដោយសារតែពួកគេ​មាន​​ពិការភាពខួរក្បាល ជំងឺឆ្កួត​ជ្រូក​ ជំងឺអូទីស្សឹម ពិការភាពបញ្ញា និង​ស្ថានភាពដទៃទៀត​ដែលពាក់ព័ន្ធយ៉ាងជិតស្និទ្ធ​ជាមួយនឹង​ពិការ​ភាព​បញ្ញា ឬដែលតម្រូវឲ្យមានការព្យាបាលស្រដៀងគ្នានោះ។ “ពិការភាពធ្ងន់ធ្ងរ” ត្រូវលើកយកមកពិភាក្សាយ៉ាងលម្អិតនៅក្នុងជំពូ​ក​ទីពីរ​នៃសៀវភៅ​ណែនាំនេះ។ ជំពូក​ទីពីរ​ នៃ​សៀវភៅណែនាំ​នេះ​។
2. បុគ្គល​ដែល​មានការប្រឈម​ខ្ពស់​​ក្នុង​ការ​ចិញ្ចឹម​បីបាច់​កូន​ដែល​មាន​ពិការភាពផ្នែក​​លូត​លាស់ ឪពុកម្តាយ​ និង​ទារក​ទើបកើត​នៅក្នុងប្រភេទក្រុមនេះ អាចទទួលបានសេវា​វាយតម្លៃ​ និងសេវាបង្ការ។ [[ផ្នែក​ 4642 និង​ 4644.]]
3. ទារ​ក​ដែលមាន​​អាយុ​ក្រោម​ 3ឆ្នាំ​​កំពុង​មាន​ហានិភ័យ​ខ្ពស់​ក្នុង​ការ​ធ្លាក់​ខ្លួន​ពិការ​ផ្នែក​លូត​លាស់​។ ឪពុកម្ដាយ​ និង​ទារក​​នៅ​ក្នុង​ក្រុម​នេះ​​ អាច​ទទួល​បាន​សេវា​វាយ​តម្លៃ​ និង​សេវា​បង្ការ​បាន​។ [[ផ្នែក​ 4642 និង 4644.]]
4. កុមារដែល​មានអាយុ​ 3 ឬ 4ឆ្នាំ​ អាច​នឹងមាន​ “សិទ្ធិ​ទទួលបានជាបណ្តោះអាសន្ន​”។ នេះ​មានន័យថា​​ពួកគេ​មិនមានលក្ខណៈសម្បត្តិគ្រប់គ្រាន់​មាន​ “ពិការភាព​ផ្នែកលូតលាស់​”។ ប៉ុន្តែ តាមរយៈសិទ្ធិទទួលបានជាបណ្តោះអាស​ន្ន​ ពួកគេអាច​ទទួលបាន​សេវានៃ​មជ្ឈមណ្ឌល​ក្នុង​តំបន់​ពេញលេញ​ ខណៈដែល​ពួកគេ​មានអាយុ​ 3 និង​ 4ឆ្នាំ​។ [[ផ្នែក​ 4512(a)(2)]] មើល​ ជំពូក​ពីរ​ សម្រាប់​សិទ្ធិទទួលបាន​របស់​មជ្ឈមណ្ឌល​ក្នុង​តំបន់​។

បុគ្គល នៅក្នុងប្រភេទទីពីរ និងទីបី​ខាងលើ​ អាចទទួលបានសេវា​វាយតម្លៃ ​និងសេវាបង្ការការពារ។

(1.6) តើកន្លែងទំនាក់ទំនងនៅក្នុងសហគមន៍របស់ខ្ញុំដើម្បីទទួលបានសេវានិងជំនួយគាំទ្រ ស្ថិតនៅទីកន្លែងណា?

មជ្ឈមណ្ឌលប្រចាំតំបន់ គឺជាកន្លែងទំនាក់ទំនងនៅក្នុងសហគមន៍​របស់អ្នក ដើម្បីទទួលបានសេវានិងជំនួយគាំទ្រដែលអ្នកចង់បាន​និងត្រូវការ។ ដោយមានជំនួយរបស់អ្នក មជ្ឈមណ្ឌលប្រចាំតំបន់បង្កើត IPP មួយ សម្រាប់បង់ប្រាក់​ ទូទាត់​សេវា​មួយ​ចំនួននៅក្នុង IPP របស់អ្នក។

អតិថិជនម្នាក់ៗរបស់មជ្ឈមណ្ឌលប្រចាំតំបន់ ទទួលបានអ្នកសម្របសម្រួល​សេវាម្នា​ក់ ដែលត្រូវគេហៅថាជាអ្នកគ្រប់គ្រងករណី ឬបុគ្គលិកសង្គម។ អ្នកសម្របសម្រួ​លសេវារបស់អ្នក ជួយអ្នកឲ្យទទួលបានសេវា​ដែលត្រូវបានរៀបរាប់នៅក្នុង IPP របស់អ្នក ដោយរួមទាំងសេវាពីទីភ្នាក់ងារដទៃទៀត ដូចជា កម្មវិធី Medi-Cal ឬមណ្ឌលសិក្សាធិការ។ ប្រសិនបើសេវាណាមួយដែលត្រូវបានកត់ត្រានៅក្នុង IPP របស់អ្នក មិនមាន​នៅកន្លែងណាផ្សេងទៀត មជ្ឈមណ្ឌលប្រចាំតំបន់​ត្រូវបង់ប្រាក់​ទូទាត់ សេវាបែបនោះ។

មានមជ្ឈមណ្ឌលប្រចាំតំបន់ ចំនួន 21 ស្ថិតនៅក្នុងរដ្ឋកាលីហ្វ័រញ៉ា។ មជ្ឈមណ្ឌលប្រចាំតំបន់នីមួយៗ​ ​បម្រើសេវាសម្រាប់តំបន់ខុសៗគ្នា​នៅក្នុងរដ្ឋ។ ដើម្បីស្វែងរកមជ្ឈមណ្ឌលប្រចាំតំបន់សម្រាប់តំបន់របស់អ្នកនៅក្នុងរដ្ឋនេះ សូមចុចទីនេះ។ នាយកដ្ឋានសេវាសម្រាប់ការលូតលាស់ ហៅកាត់ថា DDS ត្រួតពិនិត្យ​មជ្ឈមណ្ឌលប្រចាំតំបន់​ទាំងអស់​ និង​ធ្វើឲ្យប្រាកដថាមជ្ឈមណ្ឌល​ប្រចាំតំបន់​​ទាំងនោះ អនុវត្តច្បាប់ Lanterman។ [[ផ្នែក​ 4416, 4434.]]

នាយកដ្ឋានសេវាសម្រាប់ការលូតលាស់ (DDS) គឺជាទីភ្នាក់ងាររបស់រដ្ឋ។ មជ្ឈម​ណ្ឌ​លប្រចាំតំបន់ គឺជាទីភ្នាក់ងារឯកជនដែលមិនស្វែងរក​ប្រាក់ចំណេញ​​ដែលស្ថិតនៅក្រោម​កិច្ចសន្យាជាមួយនាយកដ្ឋាន​សេវា​សម្រាប់ការ​លូតលាស់ (DDS)។ មជ្ឈមណ្ឌលប្រចាំតំបន់ ផ្ដល់សេវាមួយចំនួនជូនដល់បុគ្គលទាំងឡាយ​ដែលមាន​ពិការភាពផ្នែក​លូត​លាស់ ហើយពួកគេរៀបចំឲ្យទីភ្នាក់ងារដទៃ​ផ្ដល់សេវា។ DDS មិន​​ផ្តល់សេវាកម្ម​ដោយផ្ទាល់បានទេ​។ ​[[ARC v. DDS (1985) 38 Cal.3d 384, 388-389 (ប្រភព​ឯកសារ​យោង និងព័ត៌មានយោង​នៅខាងចុងទំព័រត្រូវបានលុប)។]]

អង្គនីតិប្បញ្ញត្តិ ថ្លែងថា នាយកដ្ឋានសេវាសម្រាប់ការលូតលាស់ (DDS) “មានយុត្តាធិការលើការអនុវត្ត​ច្បាប់​ពាក់​ព័ន្ធនឹងការថែទាំ ការឃុំគ្រង បីបាច់​ថែរក្សា និងការព្យាបាលបុគ្គលដែលមានពិការភាព​នៃ​ការ​លូត​លាស់​។​” [[ផ្នែក​ 4011.]] មជ្ឈមណ្ឌលថ្នាក់​តំ​ប​ន់​ ផ្តល់​ឲ្យបុគ្គល​ដែលមាន​ពិការភាព​ផ្នែកលូតលាស់​នូវ “លទ្ធភាព​ទទួលបាន​គ្រឿង​បរិក្ខា​រ​និង​សេវា​ដែល​សមស្រប​បំផុត​សម្រាប់​ពួកគេ​នៅក្នុង​ជីវិត​រស់នៅរបស់ពួកគេ​ទាំង​មូល​។" [[ផ្នែក​ 4620(a).]]

(1.7) តើទីភ្នាក់ងារណាផ្សេងទៀត ផ្ដល់សេវានិងជំនួយគាំទ្រ?

នាយកដ្ឋានសេវាសម្រាប់ការលូតលាស់ (DDS) បង់ប្រាក់ ទូទាត់​សេវា​និងជំនួយ​គាំទ្រភាគច្រើនបំផុត ជំនួសឲ្យមជ្ឈមណ្ឌលប្រចាំតំបន់។ 

ជួនកាល ទីភ្នាក់ងារដទៃទៀត បង់ប្រាក់ទូទាត់សេវានិងជំនួយគាំទ្រ ជំនួសឲ្យមជ្ឈមណ្ឌលប្រចាំតំបន់។ ដោយអនុលោមតាមច្បាប់ Lanterman សេវាដែលត្រូវផ្ដល់ដោយទីភ្នាក់ងារ​ដទៃទៀត គឺជាធនធានឬសេវា “ទូទៅ”។ “សេវាទូទៅ” គឺជាសេវាដែលត្រូវផ្ដល់ជូនសាធារណជន​ តាមរយៈទីភ្នាក់ងារ​ដែលត្រូវបានផ្ដល់មូល​និធិ​ជា​សាធារណៈ​។ [[ផ្នែក​ 4648(a)(8).]] អ្នកអាចត្រូវការមជ្ឈមណ្ឌលប្រចាំតំបន់ជួយសម្របសម្រួលសេវា ឬតស៊ូមតិ​ដើម្បីជួយអ្នកឲ្យទទួលបានសេវាទូទៅពីទីភ្នាក់ងារនានាដូចជា៖

• មណ្ឌលសិក្សាធិការ
• នាយកដ្ឋាន​ស្តារនីតិសម្បទា​
• Medi-Cal ឬ Medicare
• សេវា​កុមាររ​ដ្ឋ​កាលីហ្វ័រញ៉ា​ (CCS)
• សេវាគាំពារនៅក្នុងគេហដ្ឋាន (IHSS) និងទីភ្នាក់ងារដទៃទៀត។ 

ជំនួយគាំទ្រ “ធម្មជាតិ” គឺជាជំនួយដែលមិនគិតថ្លៃ ដែលអ្នកទទួលបានពី​គ្រួសារ មិត្តភក្ដិ អ្នកជិតខាង និងអ្នកដទៃទៀតនៅក្នុងសហគមន៍​របស់អ្នក។ [[ផ្នែក​ 4512(e).]] សេវា​ដែលបានទូទាត់ដោយ​មជ្ឈមណ្ឌល​ក្នុងតំបន់​ – ដូចជា​សេវា​សម្រាប់ការរស់នៅ​ដោយឯករាជ្យ​ និង​សេវា​រស់នៅ​ដោយមានការគាំទ្រ​ – អាចជួយ​អ្នក​ឲ្យ​អភិវឌ្ឍ ពង្រឹង​ ឬ​ពង្រីក​ការគាំទ្រ​បែបធម្មជាតិ​របស់អ្នក​។

(1.8) តើអ្នកណាធ្វើឲ្យប្រាកដថាសេវានិងជំនួយគាំទ្រដែលប្រជាជនត្រូវការ ពិតជាមានសម្រាប់​ពួកគេ​នៅក្នុងសហគមន៍របស់ពួកគេ?

នៅរៀងរាល់ប្រាំឆ្នាំម្ដង ក្រុមប្រឹក្សាប្រចាំរដ្ឋស្ដីពីពិការភាពផ្នែក​លូត​លាស់ ធ្វើ “ការវាយតម្លៃអំពីតម្រូវការ” ដែលពិនិត្យមើលប្រភេទ និងបរិមាណ​នៃសេវា​និងជំនួយគាំទ្រដែលគេត្រូវការ ប៉ុន្តែមិនទាន់មាននាពេល​បច្ចុប្បន្ននេះនៅឡើយ។ ការវាយតម្លៃអំពីតម្រូវការ​ ត្រូវរាយការណ៍អំពីតម្រូវការសេវា​និងជំនួយ​គាំទ្រថ្មីៗ ​ឬដែលប្រសើរជាងមុន។ ការវាយតម្លៃ​ ត្រូវពិនិត្យមើលថាតើគម្លាតក្នុងការផ្ដល់សេវា ប៉ះពាល់ដល់​អ្នកប្រើប្រាស់នៅក្នុងក្រុមមនុស្សមួយចំនួនដោយរបៀបណា។ ក្រុមមនុស្សទាំងនោះ រួមបញ្ចូលមនុស្សដែលមានពិការភាព អាយុ ជាតិពន្ធុ បញ្ហាប្រឈមជាក់លាក់ណាមួយ ឬរស់នៅក្នុងតំបន់ជាក់លាក់ណាមួយ។ ​ការវាយតម្លៃក៏ត្រូវផ្ដោតទៅលើគំរូផ្ដ​ល់សេវាដែលមានភាពច្នៃប្រឌិត​ជាជម្រើសផ្សេងមួយទៀត ដើម្បីបំពេញតម្រូវការរប​ស់អ្នកប្រើប្រាស់។ ការវាយតម្លៃអំពីតម្រូវការ ត្រូវធ្វើបច្ចុប្បន្នភាពជារៀងរាល់ឆ្នាំ។ [[ផ្នែក​ 4677.]]

ការវាយតម្លៃអំពីតម្រូវការរបស់ក្រុមប្រឹក្សារដ្ឋ គឺផ្អែកលើព័ត៌មានដែលត្រូវបានផ្ដល់ជូនដោយមជ្ឈមណ្ឌលប្រចាំតំបន់ទាំងអស់។ ការវាយតម្លៃក៏អាចរួមបញ្ចូលព័ត៌មា​នមកពី៖

• សវនាការសាធារណៈ
• ការវាយតម្លៃ​សូចនាករ​ស្នូល​ថ្នាក់ជាតិ​ (ដែលតម្រូវ​ចាំបាច់​ក្រោម​ផ្នែក​ 4571)  [[ប្រព័ន្ធធានាគុណភាព ត្រូវ​បាន​បង្កើតឡើងដើម្បីប្រមូលព័ត៌មានពាក់ព័ន្ធនឹង ការពេញចិត្តរបស់គ្រួសារ និងអ្នកប្រើប្រាស់ ការផ្ដល់សេវា និងលទ្ធផលផ្ទាល់ខ្លួន។ នាយកដ្ឋានសេវាសម្រាប់ការលូតលាស់ (DDS)​ បានផ្ដល់កិច្ចសន្យានេះជូនទៅវិទ្យាស្ថានស្រាវជ្រាវ សេវាសម្រាប់មនុស្ស (HSRI)។ វិទ្យាស្ថានស្រាវជ្រា​វ សេវាសម្រាប់មនុស្ស (HSRI) អនុវត្តការវាយតម្លៃសូចនាករស្នូលថ្នាក់ជាតិ​ ជាមួយអ្នកប្រើប្រាស់របស់មជ្ឈមណ្ឌលប្រចាំតំបន់។ ការអនុវត្តបែបនេះ ជួយប្រៀបធៀបព័ត៌មានអំពីសេវានៅក្នុងរដ្ឋកាលីហ្វ័រញ៉ាជាមួយនឹងព័ត៌មាន​ដែលត្រូវបានប្រមូលបាននៅក្នុងរដ្ឋផ្សេងទៀត។]]
• របាយការណ៍របស់មជ្ឈមណ្ឌលប្រចាំតំបន់ស្ដីពីការផ្ដល់សេវាជម្រើសផ្សេង​ដែលត្រូវបានដាក់ជូននាយកដ្ឋានសេវាសម្រាប់ការលូតលាស់ (DDS)​ ដែលតម្រូវដោយ ផ្នែក 4669.2(c)។
• របាយការណ៍ពីមជ្ឈមណ្ឌលប្រចាំតំបន់ ស្ដីពីប្រភេទ ​និងបរិមាណ​នៃសេវា​និងជំនួយគាំទ្រដែលគេត្រូវការ ប៉ុន្តែមិនអាចស្វែងរកបាន (ដែលតម្រូវ​ដោយ ផ្នែក 4677(b)(1).)
• របាយការណ៍ប្រចាំឆ្នាំស្ដីពីសេវាដែលគ្រប់គ្រងដោយខ្លួនឯង (ដែលតម្រូវ​ដោ​យ​ផ្នែក 4685.7(v).)

ការវាយតម្លៃទាំងនេះ និងរបាយការណ៍ទាំងនេះ ត្រូវបានរួមបញ្ចូលទៅក្នុង ផែនការថ្នាក់រដ្ឋរប​ស់ក្រុមប្រឹក្សា និងត្រូវផ្ញើទៅកាន់នាយកដ្ឋានសេវា​សម្រាប់ការលូតលាស់ (DDS) និងអង្គនីតិប្បញ្ញត្តិ។ ក្រុមប្រឹក្សា ពិភាក្សាពិគ្រោះយោបល់ជាមួយ ​នាយកដ្ឋា​ន​សេវា​សម្រាប់​ការលូតលាស់ (DDS) និងផ្ដល់អនុសាសន៍ឲ្យផ្ដល់មូលនិធិទៅកាន់​នាយកដ្ឋាន​ហិរញ្ញវត្ថុ។ ការផ្ដល់មូលនិធិនេះ គឺជាការផ្ដល់មូលនិធិសម្រាប់ថវិការប​ស់ រដ្ឋាភិបាល​សម្រាប់បង្កើត​កម្មវិធី​ ដោយ​ផ្អែក​លើ​ការវាយតម្លៃ។ [[ផ្នែក​ 4677(b)(6).]] សាធារណជនអាចរកបានឯកសារទាំងអស់នេះ។ មូលនិធិពិសេសមួយ (មូលនិធិអភិវឌ្ឍកម្មវិធីសម្រាប់ពិការភាពផ្នែកលូតលាស់)​ ផ្ដល់​ធនធាន​ដើម្បីចាប់ផ្ដើម​កម្មវិធីថ្មីៗ​និងពង្រីក​ឬបំប្លែង កម្មវិធីដែលមានស្រាប់។ [[*ផ្នែក​ 4677.]] ប្រាក់កាស​សម្រាប់​មូលនិធិ​នេះ​ បានមកពី​ថ្លៃ​សេវាដែល​ប្រមូល​បាន​ពី​ក្រុមគ្រួសារ​ដែលកូនៗ​របស់ពួកគេ​ត្រូវ​បាន​ដាក់បញ្ចូល​ទៅក្នុងទីកន្លែង​នៅខាងក្រៅផ្ទះ​។ [[ផ្នែក 4784.]] មូលនិធិនេះឧបត្ថមគាំទ្រកម្មវិធីដែលបានធ្វើសមាហរណកម្មសេវាសម្រាប់​ទីកន្លែងដែលបុគ្គលទាំងឡាយ រស់នៅ ធ្វើការ លេង រៀនសូត្រ ធ្វើការទំនាក់​ទំនងសង្គម និងស្ម័គ្រចិត្ត​។​សកម្មភាពទាំងអស់នេះ បង្កើនសមត្ថភាពគ្រប់គ្រងជោគវាសនា​ដោយខ្លួនឯង និងឯករាជ្យភាព​របស់​បុគ្គល​ដែល​មានពិការភាពនៃការ​លូតលាស់។ [[ផ្នែក​ 4677(​a).]] ការឧបត្ថម្ភគាំទ្រនេះ គោរពតាមអាទិភាពដែលត្រូវបានអនុម័ត​សម្រាប់ការអភិវឌ្ឍកម្មវិធី នៅក្នុងផែនការថ្នាក់រដ្ឋរបស់ក្រុមប្រឹក្សា។

(1.9) តើខ្ញុំអាចស្វែងយល់អំពី សេវាសម្រាប់ទារក​និងកុមារតូចដែលមានអាយុក្រោមបីឆ្នាំ នៅ​ទី​កន្លែង​ណា?

សេវាភាគច្រើនបំផុតសម្រាប់កុមារដែលមានអាយុក្រោមបីឆ្នាំ ត្រូវបានចែងនៅក្នុង ផ្នែក C នៃ​ច្បាប់​សហព័ន្ធ​ស្ដីពី​ការអប់រំសម្រាប់បុគ្គល​ដែលមានពិការភាព (IDEA)។ [ច្បាប់ 20 U.S.C. ផ្នែក​ 1431 និង​ផ្នែកបន្តបន្ទាប់​]] សៀវភៅ​ណែនាំនេះ​​មិនគ្របដណ្តប់​ទៅលើសេវាផ្នែក​ C នោះ​ទេ។ សម្រាប់ព័ត៌មានស្ដីពីសេវានៅក្នុងផ្នែក C សូមអានជំពូកទី12​ ស្ដីពីសិទ្ធិ​និងទំនួលខុសត្រូវនៃការអប់រំ​ពិសេស​ដោយចុច នៅទីនេះ​។

(1.10) តើសេវាកម្ម​និងការគាំទ្រ​សម្រាប់កុមារ​ដែលមានអាយុលើស​ពីរឆ្នាំ​ (អាយុបីឆ្នាំឡើង​ទៅ) ខុសពី​មនុស្ស​ពេញវ័យ​ដែលមាន​ពិការភាព​ផ្នែក​លូតលាស់​ដែរឬទេ​?

បញ្ជីសេវានិងជំនួយគាំទ្រសម្រាប់បុគ្គលដែលមានពិការភាពផ្នែកលូតលាស់ ត្រូវអនុវត្តសម្រាប់​កុមារ ​និង​មនុស្សពេញវ័យ។ [[ផ្នែក 4512(b).]] ប៉ុន្តែ សេវាជាក់លាក់​មួយចំនួន​ត្រូវបាន​ប្រើប្រាស់ជាចម្បង​ដោយ​កុមារ និងមនុស្សពេញវ័យ និ​ង​អ្នកផ្សេងទៀត​ដែលបានប្រើប្រាស់​ដោយមនុស្ស​ពេញវ័យតែប៉ុណ្ណោះ។ សិស្សដែលទទួលការអប់រំពិសេសដែលមានអាយុក្នុងចន្លោះ ពី​ 3ឆ្នាំ ដល់ 22ឆ្នាំ មានសិទ្ធិទទួលបានសេវាពីមណ្ឌលសិក្សាធិការ ដើម្បីជួយដល់ពិការភាពផ្នែក​លូត​លាស់ រប​ស់ពួកគេ។ ពួកគេទទួលបានសេវាភាគច្រើនបំផុតតាមរយៈសាលារៀន រហូតដល់ពេ​ល​ពួកគេចាកចេញពីប្រព័ន្ធសាលារៀន។ ក៏ប៉ុន្តែ កុមារ និងមនុស្សពេញវ័យដែលមានវ័យក្មេង ដែលចុះឈ្មោះនៅក្នុង​កម្មវិធីអប់រំពិសេស និងគ្រួសាររប​ស់ពួកគេ អាចទទួលបានសេវា​ពីមជ្ឈមណ្ឌលប្រចាំតំបន់។ ពួកគេអាចទទួលបានសេវាសម្របសម្រួលករណីសេវាដែលពួកគេត្រូវការ​នៅពេលពួកគេនៅផ្ទះ (ដូចជា​ការ​ថែទាំ​ជំនួ​ស ឬការថែទាំនៅពេលថ្ងៃ) និងសេវាដទៃទៀត​ដែលពួកគេ​មិនអាច​ទទួល​បាន​ពី​សាលារៀន​ ឬ​ពី Medi-Cal។ សេវាអប់រំពិសេស ត្រូវគេចាត់ទុកថាជាសេវាទូទៅ ដែ​ល​មជ្ឈ មណ្ឌល​ប្រចាំតំបន់ត្រូវប្រើប្រាស់​ដំបូង​គេបំផុត មុនពេល​ប្រើប្រាស់​ធនធានរប​ស់ខ្លួនផ្ទាល់ដើម្បីផ្ដល់សេវាដូចគ្នានេះ។

ប្រសិនបើអ្នកគឺជាមនុស្សពេញវ័យ ហើយអាចទទួលបានសេវាមួយចំនួន​នៅក្នុង IP​P របស់អ្នក ពីនាយកដ្ឋានសេវាសម្រាប់ការលូតលាស់ (DDS) ឬពី Medi-Cal មជ្ឈម​ណ្ឌ​លប្រចាំតំបន់ គួរជួយអ្នកឲ្យទទួលបានសេវា​ទាំងនោះ ​ពីពួកគេ។

(1.11) តើសេវានិងជំនួយគាំទ្រអ្វី ដែលអាចទទួលបានតាមរយៈ Medi-Cal?

Medi-Cal បង់ប្រាក់ទូទាត់សេវាថែទាំសុខភាព សម្រាប់ប្រជាជន​ដែលមាន​ប្រាក់ចំណូលទាប និងបុគ្គលដែលមានពិការភាព។ អ្នកប្រើប្រាស់សេវារបស់មជ្ឈមណ្ឌលប្រចាំតំបន់ជាច្រើន មានសិទ្ធិ​ទទួល​បាន​ជំនួយគាំទ្រពី Medi-Cal ។ កម្មវិធី​របស់ Medi-Cal ត្រូវគោរពតាម​ច្បាប់​និងបទប្បញ្ញត្តិរបស់រដ្ឋនិងសហព័ន្ធ។

ប្រសិនបើអ្នកគឺជាអ្នកទទួលអត្ថប្រយោជន៍ពី Medi-Cal នោះ Medi-Cal ទំនងជានឹងបង់ប្រាក់ទូទាត់ចំណែកមួយចំនួននៃសេវា ឧបករណ៍ និង​ការគ្រប់គ្រងករណីរបស់មជ្ឈមណ្ឌលប្រចាំតំបន់របស់អ្នក។ អ្នកប្រហែលជាពុំដឹងថា Medi-Cal កំពុងបង់ប្រាក់​ទូទាត់ជំនួសអ្នក​នោះឡើយ ពីព្រោះវានៅតែត្រូវអនុវត្តឆ្លងកាត់មជ្ឈមណ្ឌលប្រចាំតំបន់។

ប្រសិនបើ IPP របស់អ្នក រួមបញ្ចូលសេវា ឬឧបករណ៍ដែលជាទូទៅ​មិនត្រូវ​គ្របដណ្ដ​ប់ដោយ Medi-Cal ដូចជាការថែទាំជំនួស ឬសេវាគាំទ្រការរស់នៅ នោះ Medi-Cal អា​ចនឹងបង់ទូទាត់ តាមរយៈការអនុគ្រោះសិទ្ធិសម្រាប់ សេវា​នៅតាមផ្ទះ និងនៅក្នុងសហគមន៍។ សេវានៃការអនុគ្រោះសិទ្ធិ គឺជាសេវាដែល ជាទូទៅ Medi-Cal ផ្ដល់ជូនបុគ្គល ដែលស្នាក់នៅក្នុងមណ្ឌលថែទាំ តែប៉ុណ្ណោះ និងមិនត្រូវផ្ដល់ជូន​អ្នកដែ​លរស់នៅ​ក្នុងផ្ទះរបស់ខ្លួនគេផ្ទាល់នោះឡើយ។ ការអនុគ្រោះសិទ្ធិនេះ លើកលែងលក្ខខណ្ឌតម្រូវដែលថាមានតែបុគ្គល ដែលស្នាក់នៅក្នុងមណ្ឌលថែទាំតែប៉ុណ្ណោះទើបអាចទទួលបាន​សេវា​ទាំងនេះ។

អ្នកប្រើប្រាស់សេវារបស់មជ្ឈមណ្ឌលប្រចាំតំបន់មួយចំនួន អាចទទួល​សេវា​របស់ Medi-Cal តាមរយៈការអនុគ្រោះសិទ្ធិសម្រាប់សេវា​ពិការភាពផ្នែកលូតលាស់នៅតាមផ្ទះ និងនៅក្នុងសហគមន៍ ឬ “ការអនុគ្រោះសិទ្ធិ​ DD”។ ខាងក្រោមនេះគឺជាសេវាមួយចំនួន (មិនមែនទាំងអស់) ដែលអាច​ទទួលបាន ​តាមរយៈការអនុគ្រោះនេះ៖

1. ការគ្រប់គ្រង​ករណី​
2. អ្នករៀបចំផ្ទះ
3. សេវាអ្នកជំនួយសុខាភិបាលនៅផ្ទះ
4. ការថែទាំជំនួស
5. ការ​ស្តារនីតិសម្បទា
6. ការ​ភ្សាំ​ទៅ​នឹ​​​​ងបរិស្ថាន​ដែល​អាច​ចេញ​ចូល​បាន​​
7. ការថែទាំប្រកបដោយជំនាញវិជ្ជាជីវៈ
8. ការធ្វើ​ដំណើរ
9. សម្ភារៈឧបករណ៍ និង​បរិក្ខារវេជ្ជសាស្រ្តឯកទេស
10. សេវាបំពេញកិច្ចការផ្ទះ
11. ប្រព័ន្ធឆ្លើយតបនាគ្រាអាសន្នជាលក្ខណៈបុគ្គល
12. ការបណ្ដុះបណ្ដាលគ្រួសារ
13. ការថែទាំមនុស្សពេញវ័យនៅក្នុងលំនៅដ្ឋាន
14. សេវាដទៃទៀតនៃការអនុគ្រោះនេះ ដែលមានប្រសិទ្ធិភាពនិងចាំបាច់ សម្រា​ប់បង្ការការបញ្ជូនទៅកាន់ស្ថាប័នថែទាំ៖
    • ការសម្របខ្លួនជាមួយនឹងយានយន្ត
    • កិច្ចអន្តរាគមន៍នៅពេលមានវិបត្តិ
    • កិច្ចអន្តរាគមន៍ចល័តនៅពេលមានវិបត្តិ
    • សេវាមណ្ឌលអន្តរាគមន៍គ្រាមានវិបត្តិ
    • ការពិគ្រោះយោបល់អំពីអាហារូបត្ថម្ភ
    • សេវាអន្តរាគមន៍ទៅលើអាកប្បកិរិយា ដោយរួមមាន ការអភិវឌ្ឍ ការវិភា​គ និងតាមដានកម្មវិធី
    • សេវាព្យាបាលឯកទេស​

មិនមែនគ្រប់អ្នកប្រើបា្រស់សេវារបស់មជ្ឈមណ្ឌលប្រចាំតំបន់ទាំងអស់ ឬសេវារប​ស់មជ្ឈមណ្ឌល​ប្រចាំតំបន់​ទាំងអស់ ត្រូវបានគ្របដណ្ដប់​ដោយ​ Medi-Cal នោះឡើយ​។ អ្នកប្រើប្រាស់សេវារបស់មជ្ឈមណ្ឌលប្រចាំតំបន់​មួយ​ចំនួន មិនមានសិទ្ធិទទួលយកការជួយគាំទ្រពី Medi-Cal នោះឡើយ ដោយសារតែប្រាក់ចំណូល ស្ថានភាព​អន្តោប្រវេសន៍របស់ពួកគេ ឬដោយសារ​ហេតុផលផ្សេងៗទៀត។ IPP របស់អ្នក គួររៀ​បរា​ប់សេវាទាំងអស់ដែលអ្នកត្រូវការ ទោះបីជា​មជ្ឈមណ្ឌលប្រចាំតំបន់ មិនបង់ប្រាក់ទូទាត់ សេវាទាំងអស់នោះក៏ដោយ។ ប្រសិនបើ Medi-Cal ឬសាលារៀន បង់ប្រាក់ទូទាត់សេវារបស់អ្នក សេវាទាំងនោះគួរតែត្រូវបានចុះកត់ត្រានៅក្នុង IPP របស់អ្នក​។​ប៉ុន្តែវិសោធនកម្មនៅក្នុងច្បាប់ Lanterman ចែងថា មជ្ឈមណ្ឌលប្រចាំតំបន់អាចកា​ត់​បន្ថយ ឬបញ្ឈប់សេវាមួយចំនួន។ ប្រសិនបើអ្នកស្ថិតនៅក្នុងកម្មវិធីអនុគ្រោះ DD Waiver​ ហើយមជ្ឈមណ្ឌល​ប្រចាំតំបន់របស់អ្នក ព្យាយាម កាត់បន្ថយឬបញ្ឈប់សេវាមួយដែលត្រូវបាន​អនុម័ត​និងកត់ត្រានៅក្នុង IPP របស់អ្នក ចូរអ្នកទាក់ទងទៅកាន់​អង្គការ Disability Rights California ។

(1.12) តើខ្ញុំចាំបាច់ត្រូវតែជាពលរដ្ឋអាមេរិក ដើម្បីទទួលបានសេវារបស់ Medi-Cal មែនដែរឬទេ?

អ្នកមិនចាំបាច់ជាពលរដ្ឋអាមេរិកនោះឡើយដើម្បីមានសិទ្ធិទទួលបាន​ជំនួយគាំទ្រពី Medi-Cal ជន​អន្តោ​ប្រវេសន៍​ជាច្រើន មានសិទ្ធិទទួល​បានជំនួយគាំទ្ររបស់ Medi-Ca​l “ពេញលេញ” ពោលគឺជា​សេវាទាំងអស់​ដែល Medi-Cal ​ផ្ដល់ជូនជាទូទៅ។ ជនអន្តោ​ប្រវេសន៍មួយចំនួន មិនមានសិទ្ធិទទួលបានជំនួយគាំទ្រ​ពេញលេញពី​ Medi-Cal នោះ​​ឡើយ ប៉ុន្តែអាចទទួលបានជំនួយគាំទ្រដែលមានកម្រិត ដូចជា​សេវាសង្គ្រោះបន្ទាន់ សេវាសម្រាប់ការមានគភ៌ និងសេវាមណ្ឌលថែទាំមួយចំនួនទៀត។ ប្រសិនបើអ្នកទទួលបានសេវារបស់មជ្ឈមណ្ឌលប្រចាំតំបន់ ប៉ុន្តែមិនបាន​ទទួលសេវារបស់ Medi-Cal នោះមជ្ឈមណ្ឌលប្រចាំតំបន់ត្រូវបង់ប្រាក់ទូទាត់​សម្រាប់សេវានិងឧបករណ៍ដែ​លអ្នកត្រូវការនៅក្នុង IPP របស់អ្នក ប៉ុន្តែនោះគឺជាអ្វីដែលអ្នកមិនអាចទទួលបានពី Medi-Cal។

(1.13) តើមជ្ឈមណ្ឌលប្រចាំតំបន់ មានលក្ខខណ្ឌតម្រូវពាក់ព័ន្ធនឹងទីកន្លែង​រស់នៅដែរឬទេ?

ឋានៈជាជនអន្តោប្រវេសន៍របស់អ្នក មិនប៉ះពាល់ទៅដល់ភាពមានសិទ្ធិ​ទទួលបានសេវា​របស់​មជ្ឈមណ្ឌល​ប្រចាំ​តំបន់នោះឡើយ។ ប៉ុន្តែ​ច្បាប់​ Lanterman ចែងថា​អ្នកចាំបាច់ត្រូវតែ​អ្នករស់នៅ​ក្នុងរដ្ឋ​កាលីហ្វ័រញ៉ា​។ ((ច្បាប់​​រដ្ឋាភិបាល​ រដ្ឋ​កាលីហ្វ័រញ៉ា ផ្នែ​ក​ 244 រៀបរាប់​អំពី​វិធាន​នានា​ដែល​ត្រូវ​ពិចារណា​នៅក្នុង​ការសម្រេចចិត្ត​ពី​ទីកន្លែង​ដែ​ល​ការស្នាក់នៅរបស់អ្នក​ស្ថិត​​នៅ​)) ជាទូទៅ អ្នកគឺជាអ្នកតាំងទីលំនៅក្នុងរដ្ឋកាលីហ្វ័រញ៉ា ប្រសិនបើអ្នក​រស់នៅ​ក្នុងរដ្ឋកាលីហ្វ័រញ៉ា និងមានផែនការថានឹងស្នាក់នៅ។ ​អ្នកអាចរស់នៅតែមួយកន្លែងប៉ុណ្ណោះនៅពេលតែមួយ។ វាមិនមានបញ្ហានោះទេ ប្រសិនបើអ្នកចាកចេញពីរដ្ឋកាលីហ្វ័រញ៉ា​ក្នុងរយៈពេលខ្លី ដរាបណាអ្នកមានផែនការនឹងវិលត្រឡប់មកវិញ។ ចំពោះកូនដែលមិនទាន់រៀបការដែលមានអាយុក្រោម 18 ឆ្នាំ ទីកន្លែង​ស្នាក់នៅរបស់ពួកគេ ជាទូទៅ គឺដូចទៅនឹងទីកន្លែងស្នាក់នៅ​របស់ឪពុក​ម្ដាយ​របស់ខ្លួន។

ប្រសិនបើអ្នកស្នាក់នៅក្នុងរដ្ឋកាលីហ្វ័រញ៉ា ដោយផ្អែកលើទិដ្ឋាការ​បណ្ដោះ​អាសន្ន វាលំបាកនឹងបង្ហាញភស្តុតាងថា​អ្នកគឺជាអ្នកតាំងទីលំនៅ ក្នុងរដ្ឋកាលីហ្វ័រញ៉ា។ ទិដ្ឋាការបណ្ដោះអាសន្នបញ្ជាក់ថាអ្នកកំពុងស្នាក់នៅក្នុងប្រទេសនេះ​ជាបណ្ដោះ​អាស​ន្ន មិនមែនជាអចិន្ត្រៃយ៍នោះឡើយ។ មជ្ឈមណ្ឌលប្រចាំតំបន់ អាចនឹងជឿអ្នក ​ប្រសិនបើអ្នកនិយាយថា​អ្នកមាន​ផែនការស្នាក់នៅទីនេះដោយប្រើប្រាស់ទិដ្ឋាការបណ្ដោះអាសន្ន។ ចូរពិគ្រោះពិភាក្សាជាមួយមេធាវីផ្នែកអន្តោប្រវេសន៍ មុនពេលអ្នកធ្វើ​បែបនេះ។ វាអាចប៉ះពាល់ដល់ឋានៈអន្តោប្រវេសន៍រ​បស់អ្នក។

(1.14) តើព័ត៌មានអំពីខ្លួនខ្ញុំនឹងត្រូវរក្សាជាសម្ងាត់ ដោយមជ្ឈមណ្ឌលប្រចាំតំបន់ ដែរឬទេ?

ព័ត៌មាននិងកំណត់ត្រាទាំងអស់របស់មជ្ឈមណ្ឌលប្រចាំតំបន់ស្ដីពីរូបអ្នក ត្រូវរក្សាទុ​កជាការសម្ងាត់។ ((ផ្នែក 4514.)) មុនពេល​នរណាម្នាក់​អាច​មើលឃើញ​ព័ត៌មានរបស់អ្នក មជ្ឈមណ្ឌលក្នុង​តំ​បន់ចាំបាច់​ត្រូវ​ការ​ការអនុញ្ញាត​ពីអ្នក​ អ្នកមើលថែទាំអ្នក ឬ​បុគ្គលណាម្នាក់ដែលអ្នក​និយាយថា​ជាតំណាង​ឲ្យអ្នក​។ ប្រសិនបើអ្នកមានអាយុក្រោ​ម 18 ឆ្នាំ ឪពុកឬម្ដាយរបស់អ្នក ឬអាណាព្យាបាលស្របច្បាប់របស់អ្នក ត្រូវផ្ដ​ល់ការអនុញ្ញាត។ មានករណីលើកលែងតែមួយចំនួនតូចប៉ុណ្ណោះ សម្រាប់វិធាននេះ​។​តុលាការនិងទីភ្នាក់ងារអនុវត្តច្បាប់ អាចពិនិត្យមើលកំណត់ត្រារបស់អ្នក​នៅក្នុងស្ថានភាពមួយចំនួន។ អ្នកស៊ើបអង្កេតផ្នែកអាជ្ញាប័ណ្ណ អាចពិនិត្យមើលកំណត់ត្រា​របស់អ្នក ប្រសិនបើ​ពួកគេ​ត្រូវការ​កំណត់ត្រា​ទាំង​នោះ​ដើម្បីធ្វើឲ្យប្រាកដ​ថា​មណ្ឌល​សុខភាព និងមណ្ឌលថែទាំនៅក្នុងសហគមន៍កំពុងតែផ្ដល់ការថែទាំ​យ៉ាងល្អ។ ((ផ្នែក​ 4514(a)-(p).)) អ្នកមានសិទ្ធិពិនិត្យមើល និងចម្លងកំណត់ត្រានៅក្នុងសំណុំឯក​សាររបស់​មជ្ឈមណ្ឌលប្រចាំតំបន់របស់អ្នក។ ((ផ្នែក 4725 និង 4726.)) ប្រ​សិនបើអ្នក​សុំមើល​សំណុំ​ឯកសាររបស់អ្នក​ មជ្ឈមណ្ឌលក្នុង​តំ​បន់មាន​ពេល​ធ្វើការបីថ្ងៃ​ដើម្បី​បង្ហាញ​ឯកសារ​របស់អ្នក​។ ((ផ្នែក 4728.)) អ្នកក៏អាចផ្ដល់ការអនុញ្ញាតឲ្យអ្នកណាម្នាក់ផ្សេងទៀត ពិនិត្យមើល​សំណុំឯកសាររបស់អ្នកផងដែរ។

(1.15) តើមានការកំហិតអំពីប្រាក់ចំណូលដើម្បីមានសិទ្ធិទទួលបានសេវារបស់​មជ្ឈមណ្ឌល​ប្រចាំ​តំបន់ ឬការទូទាត់ថ្លៃចំណា​យសម្រាប់សេវាទាំងនេះ​ដែរឬទេ?

មជ្ឈមណ្ឌលប្រចាំតំបន់ ផ្ដល់ជូនអ្នកនូវសេវា​និងជំនួយគាំទ្រ​ដែលអ្នក​ត្រូវការ ដោ​យសារតែពិការភាពផ្នែក​លូត​លាស់របស់អ្នក។ ប្រាក់ចំណូលរបស់អ្នកមិនប៉ះពាល់ដ​ល់​ការទទួលសេវានោះឡើយ។ ច្បាប់ Lanterman មិនបានចែងថាអ្នកត្រូវបង់ប្រាក់ទូទា​ត់សេវា​និងជំនួយគាំទ្រនៅក្នុង IPP របស់អ្នកនោះឡើយ។ ប៉ុន្តែ នៅក្នុងស្ថានភាពខ្លះ ច្បាប់ Lanterman តម្រូវឲ្យគ្រួសាររបស់អ្នកបង់ទូទាត់សេវានៅក្នុង IPP របស់កុមារ​។