អ្នកអាចនៅក្នុង PACE ហើយនៅតែជាអតិថិជនមជ្ឈមណ្ឌលក្នុងតំបន់ដដែល។អ្នកមិនអាចនៅក្នុង PACE និងនៅលើកម្មវិធី DD Waiver ក្នុងពេលតែមួយបានទេ។
កម្មវិធីការថែទាំរួមបញ្ចូលគ្នាទាំងអស់សម្រាប់មនុស្សចាស់ (Programs of All-Inclusive Care for the Elderly, PACE) ផ្តល់សេវាវេជ្ជសាស្រ្ត និងសង្គមសម្រាប់មនុស្សដែលមានអាយុចាប់ពី 55 ឆ្នាំឡើងទៅ ដែលមានលក្ខណៈគ្រប់គ្រាន់ទទួលបានការថែទាំតាមផ្ទះថែទាំ ប៉ុន្តែអាចរស់នៅតាមផ្ទះដោយមានការគាំទ្រ។ PACE ត្រូវបានដំណើរការទូទាំងរដ្ឋកាលីហ្វ័រញ៉ាដោយអង្គការ PACE ក្នុងតំបន់។ អតិថិជនរបស់មជ្ឈមណ្ឌលក្នុងតំបន់អាចចូលរួមគម្រោង PACE ដោយមិនបាត់បង់សិទ្ធិទទួលបានរបស់មជ្ឈមណ្ឌលក្នុងតំបន់នោះទេ។ ទោះបីជាអ្នកអាចរក្សាសិទ្ធិទទួលបានរបស់មជ្ឈមណ្ឌលក្នុងតំបន់របស់អ្នក ប្រសិនបើអ្នកចុះឈ្មោះក្នុង PACE យ៉ាងណាក្តី ក៏អ្នកត្រូវតែទទួលបានអត្ថប្រយោជន៍ Medicare និង Medi-Cal ទាំងអស់របស់អ្នកតាមរយៈ PACE តែប៉ុណ្ណោះ។ នេះមានន័យថា ប្រសិនបើមជ្ឈមណ្ឌលក្នុងតំបន់របស់អ្នកកំពុងផ្តល់ឱ្យអ្នកនូវសេវាកម្មណាមួយដែលមានផ្តល់ជូនតាមរយៈ Medicare ឬ Medi-Cal អ្នកនឹងត្រូវទទួលបានពួកវាពីគម្រោង PACE របស់អ្នក បន្ទាប់ពីអ្នកចុះឈ្មោះ។ អ្នកសម្របសម្រួលសេវានៅមជ្ឈមណ្ឌលក្នុងតំបន់របស់អ្នក ត្រូវធ្វើការជាមួយគម្រោង PACE ក្នុងមូលដ្ឋានរបស់អ្នក ដើម្បីធ្វើឱ្យប្រាកដថាមិនមានសេវាជាន់គ្នាដែលពួកគេនីមួយផ្តល់ជូនអ្នក។ មជ្ឈមណ្ឌលក្នុងតំបន់របស់អ្នក និងគម្រោង PACE របស់អ្នក គួរតែធ្វើការរួមគ្នាដើម្បីបង្កើតកិច្ចព្រមព្រៀងជាលាយលក្ខណ៍អក្សរដែលចែងថាអ្នកណាជាអ្នកទទួលខុសត្រូវក្នុងការផ្តល់សេវាកម្មនីមួយៗរបស់អ្នក។
ប្រសិនបើអ្នកស្ថិតលើកម្មវិធី Medi-Cal ដូចជាការលើកលែងសេវាកម្មតាមផ្ទះ និងសហគមន៍សម្រាប់ជនពិការផ្នែកលូតលាស់ (ហៅកាត់ថា DD Waiver) អ្នកនឹងត្រូវផ្តាច់ចេញពីការលើកលែងមុនពេលចូលរួមជាមួយ PACE ។ ប្រសិនបើអ្នកនៅលើកម្មវិធី DD Waiver ហើយសម្រេចចិត្តថាអ្នកចង់ដកឈ្មោះចេញពីការលើកលែងនេះដើម្បីឱ្យអ្នកអាចចូលរួមជាមួយ PACE នោះអ្នកនៅតែអាចទទួលបានសេវាកម្មពីមជ្ឈមណ្ឌលក្នុងតំបន់ដែល PACE មិនផ្តល់ជូន ប៉ុន្តែប្រភពមូលនិធិសម្រាប់សេវាកម្មរបស់អ្នកនឹងផ្លាស់ប្តូរ។
ការចូលរួមជាមួយ PACE ឬអត់នោះ គឺជាការសម្រេចចិត្តផ្ទាល់ខ្លួន។ពិតមែនតែសេវាកម្មមួយចំនួនដែល PACE និងមជ្ឈមណ្ឌលក្នុងតំបន់ផ្តល់គឺស្រដៀងគ្នា ប៉ុន្តែមានផ្នែកនានាដែលប្រព័ន្ធសេវាទាំងពីរនេះខុសគ្នា។មជ្ឈមណ្ឌលក្នុងតំបន់ផ្តល់ជូននូវជំនាញ អ្នកផ្តល់សេវា និងសេវាកម្មដែលរៀបចំសម្រាប់ជនពិការផ្នែកលូតលាស់។ កម្មវិធី PACE ត្រូវបានរៀបចំឡើងសម្រាប់មនុស្សដែលមានអាយុចាប់ពី 55 ឆ្នាំឡើងទៅ។ អ្នកអាចដឹងថាពិតជាមានប្រយោជន៍ក្នុងការទទួលបានសេវាកម្មពីកម្មវិធីទាំងពីរ ប្រសិនបើអ្នកមានពិការភាពផ្នែកលូតលាស់ មានអាយុ 55 ឆ្នាំ ឬចាស់ជាងនេះ មានសិទ្ធិទទួលបានការថែទាំតាមផ្ទះថែទាំ ហើយគិតថាអ្នកនឹងទទួលបាននូវអត្ថប្រយោជន៍ពីឯកទេសបំពេញបន្ថែមនៃប្រព័ន្ធទាំងពីរនេះ។ ម្យ៉ាងវិញទៀត ប្រសិនបើអ្នកចូលចិត្តសេវាកម្មមជ្ឈមណ្ឌលក្នុងតំបន់របស់អ្នក និងអ្នកផ្តល់សេវាវេជ្ជសាស្រ្តបច្ចុប្បន្ន អ្នកប្រហែលជាមិនចង់ចូលរួមជាមួយ PACE ទេ។ ការចូលរួមជាមួយ PACE នឹងតម្រូវឱ្យអ្នកទទួលបានសេវាកម្មពីអ្នកផ្តល់សេវាដែលបំពេញការងារ និងជាប់ កិច្ចសន្យារបស់ PACE ។ ភាគច្រើននៃអ្នកផ្តល់សេវាទាំងនេះនឹងខុសពីអ្នកផ្តល់សេវាបច្ចុប្បន្នរបស់អ្នក។ ព័ត៌មានបន្ថែមមាននៅ www.calpace.org។